Tongdentsüyong ward nung MSKT pur commercial ki ka mesemtet

Mokokchung, November 29 (TYO): 1942 nung Mokokchung Senso Kaketshir Telungjem (MSKT) tenzüker 2017 küm Platinum Jubilee amungba nüngtem Mokokchung town kübok Tongdentsuyong ward nung commercial building ka “MSKT KI” ta tenüng jatsür 29th Nov, 2025 nü MLA & Advisor, Minority Affairs & Sericulture, Govt. of Nagaland, Imkongmar-i meraketa lapoktsüogo. Mokokchung Baptist Arogo Pastor, Rev. Imti-i iba ki meshitettsü.

MLA & Advisor, Imkongmar-i iba sentong nung jembidang, lanurtem talisa kaketshirtemi iba ama lung ki tajung ka sütettsüsa moatsüba asoshi Tsüngrem tenüng asanger aser ya alima tsüngdang tejak tentetba mapa tajung ka lir, ta pelaba metetdaktsü.

Tsüngremi Mokokchung Riongsanger Putu mapang temoatsü jenti moatsüba ajangshia arur. Tanü iba ki asangsang kümtetba aser pa yimsüsüba menden nung mentettsüsa maongka anguba item ajakji tongtibangsa yimden aküm nung parnoki lanur dak teimla yur tongti shilem agiba ajanga lir, ta ashi.

1890 nung Mokokchung mesemtetba mapang yimertemi Mokokchung town ya iba amai renloka aotsübo meimla südi, saka ibai Tsüngremer sentong ka liasü, anungji, Pai asenok iba tashi moatsüba asoshi Pa tenüng sanga külem pur medemer, tino-tapur den tila küma timi libaliru tajung nung putepa alitsü asoshi pai tayongzükba ka agütsü. Paisa lanurtem dang maparen ajak nung Tsüngrem tama südaktsür inyaktsü ayongzüka liasü.

Iba ki ya 30th January, 2024 nungi asü tenzük aser ibai sen crore ka dak tali intoker renemba indang MSKT Kisür Luden tayonger, I. Wati Kichu-i kisüba osang metetdaktsü. Iba ki renemtettsüsa Mokokchung yimdeni anir Arogo, MLA & Advisor Imkongmar parnoki tongti shilem agiba den senso nübur shirnokisa tenla balala ajanga yaritepogo, parnok ajak dang paisa pelaba metetdaktsü.

Iba sentong nung MSKT Kisür Luden züngsem, Lanu Atsongchanger menden liasü. Mokokchung Senso Kaketshir Telungjem Tir, Akumtemsu Lkr aser Mokokchung Village Council Chairman, L Mapu Lkr nadia tepela o lemsatep. MSKT kimen C. Toshi Atsongchanger den temoatsü meshia sarasademer iba sentong tenzük aser Mokokchung Baptist Arogo Assoc. Pastor (W), Lemtila-i tenüngsang agüja sarasademer sentong tembang.