Tongpang Ozukum-i Longkong nung Mahseer Hatchery project lapoktsü

Dimapur, Rongchii (April) 25 (TYO): Nagaland state Fishery department-i ICAR-Directorate of Coldwater Fishery Research (DCFR) Bhimtal, Uttarakhand den yaritepa Mokokchung district kübok Longkong yimtsüng nung Mahseer Hatchery project lapoktsüogo.
Longkong yimtsüng kübok Suteplenden nung tenzükba Mahseer Hatchery project ji Nagaland nung mezüngbuba lir aser sen lakh 15 endoka yanglu.
Rongchii (April) 25, 2018 nü PWD Minister, Tongpang Ozukum-i iba project tenzüktsü. Iba sentong nung ICAR-DCFR nungi tongti ketdangsertem den scientist tem aser Nagaland Fishery department nungia ketdangsertem aden.
Sentong nung o jembidang Tongpang Ozukum-i ICAR-DCFR aser state Fishery department nem tenüngsang agütsü.
Iba mapatong ajanga Nagaland nung ango wazüka ayutsü aser mahseer hatching centre lapokba ajanga iba ango aika arentsü, ta Tongpang-i ashi.
Mozü amshia ango apuba aser ano tanga yimyatem amshia apuba ajanga ango ajema kümdaktsür. Anungji department-i public dang ayongtem nung ango wazüka ayutsü atema tesayuba agütsütsüla aser ango nem chiyungtsü agütsüba aser metsüba yimyatem jungjunga sayutsüla, ta paisa ashi.
Department-i iba hatchery unit ya jungjunga anepalutsüla aser tajungba kümdaktsütsüla, ta Tongpang-i ashi aser paisa Suteplenden Multi Farm kibur Imnutoshi kibur dang pelaba metetdaktsüba den department-i akokba tashi yaritsü ayongzük.
Iba sentong nung Director ICAR-DCFR Bhimtal, Dr. Debajit Sarma, Dr. R.S Haldar Nodal Officer, ICAR-DCFR aser Dr. Sudhir RAIZADA ADG (Inland Fishery) nungertemia o jembi.
Sentong nung tetushi süa jaokerji Dr. Sudhir Raizada liasü aser pai ashiba agi Kohima district kübok Tzulaki nunga ICAR-DCFR-i Trout hatchery project ka tenzüktsü.
Sentong nung mendenji Department of Fishery Secretary, T. Mhabemo Yanthan liasü aser Director Fishery, Kevisa Kense-i anküp tepela o jembi.