Tongpang Ozukum-i Tuensang nung gari lenmang teyangludak semdang

Tuensang, Rongchii (April) 27 (TYO): State kübok tang district balala nung gari lenmang teyanglushidak sema senzüa tanü PWD Minister, Tongpang Ozukum-i Tuensang nung PWD, Tuensang Division ketdangsertem aser district ketdangsertem den külemi jila nung gari lenmang teyanglushidak repranga senzü.
Department ketdangsertemi minister dang item maparen indang osang tongmelang agi metetdaktsü, iba denji külemi maparen nung timtem balala ajangshiba metetdakja liasü.
Department-i tetsükdaktsü jenti ajuruaka mapa junga inyakba reprangteta Tongpang Ozukum-i pelaba metetdaktsü.
Paisa PWD ketdangsertem aser aayangertem dang, nüburtem ajangzüktsü atema maneni kanga nendaka inyaktsü ajungshi liasü.
Pai nüburtem danga gari lenmang yanglushiba mezüngbuba shilem mapang shidak nung tembanga inyaktettsü atema nüburtem dang PWD den amalitepa inyaktsü ajungshi.
Minister, Tongpang Ozukum-i district ajak nung tang gari lenmang teyanglushidak sema tesenzüdak lir. Pai state sema senzüba nükjidong ya district balala nung PWD ketdangsertem den metepelaba den külemi district balala nung timtem balala metettsü aser nüburtem nüngdak metettsü atema lir.
Tang tashi nung minister aser ketdangsertemi Kohima, Dimapur, Wokha, Mokokchung aser Tuensang district tem semdangogo.
Asüng Minister-i Noklak district semdangtsü, aser taruba hopta ana tsüngda pai district ajak semzüktsü imlar.