Tongti BCCI ketdangser kati Nagaland semdang

BCCI ketdangser, Ashish Bhowmick aser Nagaland Cricket Association (NCA) nung ketdangsertemi Dimapur nung tentetba Nagaland Cricket Stadium semdangdang agiba noksa ka yangi angur. (Dimapur, April 29)

Dimapur, April 29 (TYO): India ajunga nung cricket asaya ketdang asür, Board of Control for Cricket in India (BCCI) nung tongti ketdangser kati Nagaland semdangba osang ka Nagaland Cricket Association (NCA) nung General Secretary, Abu Metha-i sangdong ka ajanga tanü, Hokolbar nü metetdaktsüogo.
“BCCI kübok tentetba Pitches & Ground Committee Board nung züngsem, Ashish Bhowmick-i Dimapur nung tentetba Nagaland Cricket Stadium (NCS) semdanga, asayadak reprangshia senzüba den külemi, NCA ketdangsertem den senden ka amen,” ta pai ashi.
Bhowmick-i tanü NCS semdangdang Dimapur kübok Spring Club teloki ayonger tang NCS nung tasayadak Twenty20 (T20) asyamong nung shilem agir asayartem den sensaksema liasü.
“Tanü senden nung NCA ketdangsertemi NCS asayadak aser idakji tentetba ki o jen den sentakba osangtsüsang lemsatepba den külemi, NCA-i asaydak anepalutsüren nung timtem ajuruba khuret BCCI ketdangser den lemsatepa liasü,” ta Abu-i metetdaktsü.
“India nung ayongba tongti cricket asayamong, Ranji Trophy asayatem asayadak nungi NCS jenjang tajungba lir,” ta shia, Bhowmick-ia NCA-i asayadak junga anepaluba atema pelaba olen ka metetdakja liasü.
Ano, Tripura-i Nagaland densema, Northeast nung tentetba state ajunga nung cricket asayatsüren jenjang tajungba kümdaktsütsü atema nungdakba teyari agütsütsü tenangzükba olen ka Tripura Cricket Association (TCA) nung Joint Secretary mendena abensang, Bhowmick-i nangzük ta Abu-isa shisem.