Tongti osangzülur pua bener aotsü merang

Islamabad, Aenjeti 10 (Agencies) : Tanü Bodhbarnü Islamabad yimti nung Pakistan nunger osangzülur ka nisung kari pua bener aotsü merang saka jenbuogo. Iba osangzülur yagi aiben tashi tait sepaitem anemsa osang zülur ta osng ka ajanga metetdaktsü.
Osangzülur tenüng agi Taha Siddiqui shibai 2014 küm France nungeri osangzülurtem nem agütsüba tetushi tematiba, Albert Londres prize angu, pa ya Rawalpindi yimti nung tayimtsü anendaki ooya aliba mapang nisung ter dak temai pua bener aotsü merang saka atsütepdang tera yiruba dak alaka puabo bener moteti jenbuogo.
Indian television channel tenüng agi WION nung Siddiqui ya Pakistan nunger rongnung bureau chief lir; pai France 24 nunga osangzülur liasü.
Linük nung sepaitem inyakyim anema osangzüluba atema ketdangsertemi amokmerena liasü ta taoba nunga pai mepelaba osang metetdaktsür liasü.
Osangzülurtem anema tashiyim inyaktsü merangbaji tsüremseta bilemer, ta nübur temeten atema nokdaker aser osangbener teloktemia khuretsüa metetdaktsüogo.
Rawalpindi Islamabad Union of Journalists-i ashiba agi, osangzülur tongti anema inyakba maparenji bushidüngdangtsü atema tetuyuba agüjang ta Interior Minister, Ahsan Iqbal dena jembiogo.