Tongti Syria sorkar anemer telok, HNC Geneva tongogo

United Nations’er Syria Envoy, Staffan de Mistura-i United Nations European headquarters, Geneva nung Syria yimjung senden lapoktsüba sülen osangbener den ajurutepba noksa nung angur. (Geneva, January 30)

Geneva, January 30 (Agencies): Syria Tir, Bashar al-Assad aser pai aniba Syria sorkar anemer tongti telok, Higher Negotiation Committee (HNC) telok kati Switzerland kübok Geneva yimti tanü, Honibar nü tonga aoba osang jangjaogo.
Ajisüaka, Saudi Arabia sorkari nungitba HNC teloki tang Geneva nung temendak Syria yimjung senden nung shilem agitsü asü magitsü iba osang tang tashi mejangteti lir.
Taoba küm 5 tejaklen nungi tenzüka Syria sorkar aser sorkar anemer na tsüngda mangatettep adoka tongpang raraba anenja par linük nung yimji yimjung lidaktsütsü nükjidong nung United Nations (UN)-i ayonger külen yashi, Hokolbar nü nungi tenzüka Geneva yimti nung yimjung senden amen tenzüka lir.
Yashi senden nung UN’er Syria envoy, Staffan de Mistura aser Syria’er UN envoy, Bashar al-Jaafari-i aniba Syria sorkar telok nati shilem agiba osang jangjaogo.
“Syria sorkar telok den yimjung senden menogo. HNC telok dena tan Deobar nü ajurutepa yimjung senden amentsü imlar,” ta Mistura-i yashi senden tembangba sülen metetdaktsü.
“HNC teloki tan ayongba yimjung senden nung shilem agitsü amanger. Par teloki tan senden nung shilem agiba ajanga Syria’er mangatettep ken o bentettsü lenmang ngutettsü imlar,” ta pai ashi.
Syria sorkar aser par linük pusemba Russia mitkartemi nüburtem aliba tesemtem nung amakba maparen inyakba aser HNC teloki agia aliba tesemtem tanaben agishitsü maparen manen tashi par teloki Syria yimjung nung shilem magitsü ta HNC teloki taoba mapang metetdaktsü.
Ajisüaka, par teloki benokba takhangba mapa küma inyaktsü nangzükba olen ka metetdaktsüba sülen HNC-i par telok ka Geneva-i yoktsü lemtetba osang ka yashi, Hokolbar nü metetdaktsü.
“HNC teloki Syria yimjung senden nung shilem agitsü lemtetba osangji United States sorkari kanga pela agizüker,” ta US Secretary of State, John Kerry-ia tanü metetdaktsüogo.