Tongti tesemdanger & Tetushi tejaoker

~ L. Kika Pongener, Aoyimküm, Dimapur.

Tir Yimyim 8th January 2016 adok nung Yimozüluri tongti tesemdanger jaokba sobaliba indang züluba ni tajangzük temoatsü kanga ngua azüng.Anungji iba nung tu semloka ano nia kar lemsatepner. Atangji tanü asen putu nung benjongbentsü aser mongdang-mongji ajak nung tongti tesemdanger aser tetushi – tejaoker tenüngteta jaoker aser iba jagi benjong aser mongdangji meraketdaktsür, saka ano tip külen meyipa reprangdangra benjong mera-aketba tang nungibo nüburtem takoksa anguba-ang tuluba ta-ka asadangteter,kechiaser yimozüluri zülusem amatu asen nuburtem tangatetba ya benjong meraketdakja aser kati ka akümkettsüa tushiba tuluba masü, saka pa nungi senotsü teyari angutsü teimla tuluba ser jaoker asünung tajangzük melena takoksa-ang tuluba asür.Aji oda, kodang benjong aser mongdang ka nung tongti tesemdanger aser tetushi tejaoker ta nisüng kar tenung teta jaokdir, tatishitsü agi minister ka asünung pa kija arutsü masü pa den temeiner police escort adentsü, department nung senior officers aser staff karbo adentsü, party workers tongtipang karbo adentsü aser parnokji meinba dang masü saka parnokia donation pei pei alang agutsütsüla,aser parnok pei pei office mapa toktsür senzüba jagi official mapa nung nubor aika takoksa ajurur, ano aji dang masü parnok gari nung totzü inokba,parnok chiyunga-ajemba aser parnok tao-taru allowance (TA) aserbo tongti tesemdanger aser tetushi tejaoker shiba südir paibo sen lakh kabo, merijang tenembosa teküpbokba agi agütsütsüla, ibaji shibai magütsülir mesüra kurua agütsüdir pabo ari-mashitsüsa tetla-tetshitsü. Sürabangla item rongsen ajakji terenlok mapa inyaktsü melena intoker masü no ? Ano tip külen benjong aser mongdang ayungertemji-a tongti tesemdanger aser tetushi tejaokertem aser pa den meina arurtem ajakji jangratema sütoksünema chiyungdaktsütsü asoshi ayong asep-i aser shikari-i hajira dalang agütsür yoktsü,aser parnok nem sen merijang aika intoka senpet tapu tapu renemtsütsü,item ajakji nübor rongsen-sa lalur masü no ? Anungji yimozüluri züluba ama oda akok ka asübo, lokti ajungai benjong-bentsü aser mongdang-mongji ajunga nung tongti tesemdanger aser tetushi tejaoker jaokba sobaliba tentet ya melenshi nungbo asen lima asoshi kangasa tajangzük asütsü ta yimozülur den semloka ku tebilemba-a ka nüburtem den lemsateper. Tatishitsü agi, Minister ka küm pongu tsüngda nung telok noklang kati tongti tesemdanger jaok aser pai telok ajunga nemji sen lakh kaka teyari agutsüra küm pongu tsüngda nung pai sen crore ka tongti tesemdanger nungdem nung indokogo. Ajioda, iba sen crore ka jagi pai par constituency nung terenlok mapa tongtipang aika inyakteter süla. Anungji iba melena kokrabangla lokti ajaki onük-osu jembir,tajungshi/tepela o tajung jembir-ang scholar tajung kar mesüra sobaliba meteter nübo tajung kar jaoka jembidaktsüba ajanga dang nübor tajangzük tuluba angutsü südi ta bilemer. Aser mongdang aser benjong nung onük-osü jembir,tajungshi/tepela o jembitsü asoshi tenüngteta jaokba lenirsangji shiba südir suaka lokti nung tarak aketba, kibalembu nung tashishitsü aketba mesüra nubori nangnanga magizüktetsüsa sobaliba aser libaliro nung tarak aketba nisüng masütsüla. Kechiba süra yamala tashishitsü aketba nisüng ka nubori tongti süa tushia amshira lanurtemi lesson tamajung angazüktsü aser lokti nung aibelena tarak aketyongjia mesüra kibalembu masüngtetyongjia kecha tashishitsü malia ta lanurtem atema lesson tamajung asütsü, anungji ibalaji angateta amshitsüla. Aser lokti-i shiba tenüngteta onük-osü,tajungshi/tepela o jembitsü tongti süa jaokdir pa/la nung jagi senotsü teyari meimlatsüla,ajisuaka pa/la taru-tao oli-ora gari totzü inoktsü atema koba lokti-i jaokdir par telok khuret asütsüla.
Ajioda, Ao Senso Telongjem Dimapur (ASTD) sanen luden ajanga Dimapur lima Aor lokti sentong nung nubur angazüktsü asoshi onuk-osü,tajungshi/tepela o jembir (Resource person) jaokba dak alaka Politician, Ministers, Parliamentary Secretaries, MLA’s & Bureaucrates shinga Tongti tesemdanger (Chief Guest) ta mejaoktsü junger ta tebilemba jeli-o ka osang kaket ajanga lemsatepba tu Ao senso nubur ajungai kangasa arok-aroka shisadanga bilemdanger, nübor ajaki junger ta agizükteta benshitetra asen Ao kin atema dang masü asen Naga nunger ajak asoshi kangasa tajangzük tulu asütsü ta bilemer. Anungji, iba onük dak sendakba nung shisalemsateptsü atema koba Ao Senso Telongjem Dimapur (ASTD) ajanga Dimapur nung Aor Lenla Mongdang ka 30th January ‘2016 10:00 a.m. nung ayongzüka lir, iba nungji Aor senso ajak medema adenshir kanga junga shisadanger tangatetba tajung nung telemtetba tajung ka agitetra iba jagi asen Ao kin dang masü ,saka Naga nunger ajak tarutsü lanu putu asoshi mera tajung ka agir asütsü ta kü tebilemba ka yimozülur den semloka lemsateper.