Tongti US ketdangser, Malinowski-i Vietnam semdangtsü

Washington, May 07 (Agencies): US State Department kübok Bureau of Democracy, Human Rights & Labour nung Assistant Secretary, Tom Malinowski-i Vietnam taruba hopta semdangtsü sentong renemba osang ka State Department-i tanü, Honibar nü metetdaktsüogo.
US Tir, Barack Obama-i tan May ita tatembanglen Vietnam semdangtsü sentong renema lir aser Obama-i Vietnam semdangtsü lenmang sadema lapoktsütsü nükjidong nung Malinowski-i mapang jilia Vietnam semdangtsü sentong renemer lir.
“Ozü lenisang, Obama-i Vietnam semdangba jakdang Malinowski-i Vietnam semdanga par linüki yimtenren ken o nung ajemdaker tepuokdak puoka ayurtem talenba kecha meli chioktsü ajungshitsü sentong renemogo,” ta State Department otongdar, John Kirby-i osang jangjashitsü.
Ano, alima ajunga nung benshiba ama, Vietnam nunga nübur nem agütsüba temeten tetsükdakba kecha meli benshitsüsa par linüki nungdakba temelenshi agitsütsü asoshi Malinowski-i Vietnam  sorkar ajungshitsü sentong renema lir ta Kirby-i metetdaktsü.
Ano külen, Obama-i par linük semdang ajanga US-i par linük anema benokba tongpang nung amshitsütsü osettsüset meyokdaktsütsü tenokdangba sentong ajunga agientsü teimla Vietnam sorkari ayuba osanga angazükogo.
US-i küm 30 tejaklen nungi tenzüka Vietnam anema benokba tongpang nung amshitsü osettsüset mayoktsü tenokdangba sentong shilem kar 2014 küm October ita agiena liasü.
Ano külen, nüburtem nem internet sadema mebenshidaktsütsüsa tenokdangbaren mebenok ta metetdaktsüba den külemi, ozüng alema inyakertem tepuokdak puoka ayuba dak alaka, sorkar anema ola adokertembo tepuokdak puoka mayur ta Vietnam-i par inyakyim metentsüba olen ka metetdaktsüogo.
South China Sea (SCS) mangatettep ken o nung ajemdaker Vietnam-i China anema nokdaktsü tenzükba mapang ka nung US-i par tangatetba aser inyakyim melenshia, Vietnam den tesendaktep junga yanglushitsü maparen tenzüker lir.