Tongtibang telemtetba magidang Rajya Sabha den tama jembitsüla: Manmohan

New Delhi, November 18 (Agencies): Hombarnü Rajya Sabha nung jembidang taoba mapang Ato kilonser, Manmohan Singh-i, Lok Sabha nung züngsemtemi Centre-state tesendaktep atema o toktepa jembitsüla, iba sülen tongtibang telemtetba magidang Centre-i Rajya Sabha den tama jembitsüla, ta ashi.
“Jammu & Kashmir agi Union territory ka kümdaktsüba nung tatalokba aika lir. Item ama telemtetba magidang sorkari council of states (Rajya Sabha) den tama jemitsüla, iba sülen ang House-i agizüktsüla,” ta pai ashi.
Rajya Sabha 250buba session nung jembidang Manmohan-i, Rajya Sabha nung inyakyim melenshitsü atema mapang tongogo, ta ashi.
“Ozüngtem kera-kera magizüktsüji asenok teinyaktsü mapa lir. O lemteptsü atema Rajya Sabha nung mapang timba angur, kechiyong Rajya Sabha nung züngsemtemji Lok Sabha züngsemtem tesadang shi dang lir, anungji tebilemba lemsateptsü aser ashishiteptsü atema yangi (Rajya Sabha) mapang timba angur. Rajya Sabha-i bill tem jelia angutsüla aser züngsemtemi mapang agia itemji asadangtsüla. Iba dak alia o jembitsü atema mapang talila agütsütsüla,” ta paisa shiesm.
Taoba Rajya Sabha Chairman, Hamid Ansari-i zero hour 12:00 ako aser question hour 11:00 ako agi melentsü lemtetba dak sendakba nung Manmohan-i, Ansari-i iba telemtetba agiba ajanga züngsemtemi zero hour nung mapang peria o lemteper, ta ashi.
“15buba aser 14buba Lok Sabha senden den mendemdangra 16buba Lok Sabha nungbo bill shilem 25 dang committees nem agütsü. Tanga house (Lok Sabha) nungji kechi koma südir süaka yangibo (Rajya Sabha) item bill ji jungjunga asadangtsü atema select committees alitsüla,” ta paisa shisem.