‘Toofan’ nung Farhan Akhtar den Mrunal-i shilem agitsü

Mongputeni/October 04, 2019 (Agencies): Tawa takok ngua sayaba ‘Super 30’ film nung Mrunal Thakur-i tongti shilem agiba ajaki jangjaa lir aser iba takok ngur aliba mapang ka nung ano project tasen ka nung shilem agitsü asoshi lai maongka nguogo, ta osang ajanga metetdaktsü.
Super 30 film nung Mrunal-i Hrithik Roshan den külemi shilem agiba sülen, taruba film ‘Toofan’ nung Mrunal-i Farhan Akhtar den külemi shilem agitsü ternemba lir, ta kasa sangdong ajanga metetdakja liasü.
Osang ajanga angazükba agi, ‘Toofan’ film atema Mrunal nem role tajung ka lemzükja lir. Iba film nung lai Farhan tetong shilem agiba angutsü. Ano külen, Farhan-i iba film nung boxer shilem agitsü, ta taoba mapang osang ajanga jangjatsüogo. Item maparen atema Farhan-i jelia pa temang anepalu tenzük aser takok ngua shilem agitsü asoshi pai renemshidar.
Tesüiba anogo ishika tejakdang, film yanglurtemi Toofan indang mezüng poster ka sayatsüba ajaki jangjaa lir. Iba film Rakeysh Omprakash Mehra-i direct asütsü aser osang ajanga angazükba agi, film ya boxing drama den külemi temeimtep otsü ka asütsü. Toofan film ya October 02, 2020 nü sayatsü latetta lir.