Toshimoa Jamir meyong “Passion Play” kensep sayaogo

Discipleship Bible College, Dimapur nung Hombar nikongdang “Passion Play” music video kensep sayaba mapang Subonenba, Toshimoa aser par tsüraburtem külemi tangokba noksa ka yangi angu.

Dimapur, December 07 (TYO): Guitar atemer Toshimoa Jamir-i adokba music video “Passion Play” kensep, Discipleship Bible College, Dimapur nung sentong tajung ka agia, Community Educational Centre Society nung mendenbuba Subonenba Longkumer-i Hombarnü sayatsüogo.

Iba kensep sayatsüdang Longkumer-i, taküm nung music kanga nüngdak aser iba yagi meimchir mulungjang nung jembir. Music ajanga asenoki akhi telemen nung merasatetba aika rasateter aser nisung ajak dak kongshir, ta ashi.

Pai, “Nü dak sempet lira shingaia na sota meyutettsü. Music meteter lanurtemi ken aser music pei sasa yanglutsüla aser tensa ajak koktettsüsa alitsüla,” ta sempet tajung alir lanurtem ajungshi.

Toshimoa Jamir-i iba kensep adokba mapa par tsürabur, medemertem aser pa meima nungitertem ajak dang pelaba lemsatepogo. Sentong nung pai tang adokba kensep nung keta aliba music ka tema sayu.

Pa Bangalore nung aliba Rock School Limited, International Rock Music Exam Board, London nung 2012 küm music nung Grade-8 tema traning agiba sülen yangji küm ana guitar tesayur inyaka liasü.

Pai India nunger music nung mongin aika den külemi shilem agiba dang masü saka ANCSU Music fest 2010 aser Sungku Tenem Open Beat Contest (Clash of the Bands) 2010 naprongla nung nung ‘Best Guitarist’ sempet agizük.