Totzü atsütettsüba tebilemtsü

Assam aser Nagaland na tsüngda artsü meladangteti mangatettep aliba tesem nung tangatettep agi ali telonglen atsüngdena aliba totzü agiteta agitsü asoshi India government dena Assam aser Nagaland  government tsüngda tangatettep ken o yanglubaji tangatsübo tajung saka mapa küma inyaka aodang asenokbo temoatsü agi timtemang aika ajurutsü amai angur. Mezüngbuba nung, artsü dak sendakba ken o nung ali kiburtem tsüngda mangatettep liaka government ana tsüngda tangatettep nung iba tesem nung ali rongsen alibajibo agiteta lemsaa agitsü jembibaji junger, aji agi state anaprongla ajangzüktsü, ajisüaka tebilemdangtsü kaji Assam tsütsübo kecha timtem malitsüa akok, kechiyong Assam lenjibo aliji government li saka Nagaland tsütsübo aliji government li masü nija li, anungji India government o Assam government na Nagaland government den Naga nunger li nung totzü bushia atsütsü lemtetbaji ali kibur den masü saka ali kiburi memetet ser tangar den telemtetba agir amai asütsü. Tanabuba tebilemtsüji, tang tashi India government den Naga yimten nüchiso bushirtem telemtetba magiteter, iba jagi Naga nunger linük tenzükertemi Naga yimten telatetba kati maru tashi Naga nunger li nungbo ali telong nung aliba rongsen bushia magitetdaktsütsü ta nokdangba osang asenoki angashiogo, anungji yakanü government asem, India, Assam aser Nagaland tsüngda Assam aser Nagaland na artsü nung totzü atsütsü tangatettep ken o renemer, ano Nagaland Chief minister-babo Nagaland tonga marudangyongi timtem tenzükogo. Atangji, asen lima ali telonglen totzü aika atsüngdena aliba osang asenoki angashir aser ibaji agiteta magitetba agi asenok timatemer, anungji asen lima nung asenok nem Tsüngremi kechisa moaja ali, itemji bushia agiteta agitettsüla. Ajisüaka, asenok meyong temoatsü asenoki agiteta magitettsüsa timtembaji tangari timtemdaktsür masü saka asenoksasa asenok timatemer, kechiyong asen government-i ali kiburtem den masüngdangtep ser ali nung sotaktsü merang tashibo Naga lima nungbo mapa meinyaktettsü. Aji oda, India temzüngia Nagaland nungbo ali  madak state government nem masü saka ali kiburtem nemang temeten aser tashi agüja lir, anungji Nagaland nungbo government-i ali nung langka danga inyaknüra ali kiburtem dang tama asüngdangtsüla aser tang ama totzü agitettsü jembiba maparen nungjia ali kiburtem den tama jembia parnok nema tagitsü shilem kechi agütsütsü, aji tama lateta yur külenang tangar den jembitsüla. Ashiko, India aser Assam government den tangatettep ken o yangluba nungji Naga nunger ali kiburtem asoshia shilem ka agütsütsübajia latetja alitsüa akok, ajisüaka asenoki parnok tsüngda renemba ken o ji mangu nungji tejangjabo meshitetter. Ibaji dang masü saka asenokbo totzü tazü atsür odaktsübaji dang asü mesüra totzü atsür telok jagia Naga nunger ajangzüktsü asoshi mapa tajung karbo inyaktsütsü latetja lir ta asübajia temetetnütsüka. Assam nungbo, akhidang Assam kaketshirtemi India government dang Assam nungi totzü tazü atsür aobaji masü saka tozü moludaka alitsüla ta akangba agi tanü Numaligarh nung totzü moludak amenoka lir. Iba ama tagitsü mapaji ajizüka asenokia inyaktettsü. Atangji, tanü Nagaland nung totzü atsüteta magitettsüsa ajuruba timtem takoksa ya tulu saka item timtem takoksaji kokteta inyaktsübaji tamakoktsübo masü. Aji oda, asenoka talangka asen akaba rongsen mamshitet timtema melii Tsügremi moatsüba rongsentemji agiteta amshitsüsa state government nung alirtemi ali kiburtem züngoka parnok nema parnok tagitsü shilem agütsütsüla aser Naga yimten tebilemtsü ken o yaa talangka mesangdaka meyui telemtetba kati arutettsüla. Iba ama tagitsü ken o aser mapa nung government nung alirtemi inyakba nung shisatsü agi matonger ama reprangtetra, Naga kin shia telungjem nung lenirtemi yimten yimsüsürtem den shisalemsateptsüla. Iba jagi Naga nunger ajak ajangzüktsüsa len tajung kabosa pipoka otettsü.