Totzü metre meshidaki amshiba atema Yimyu Ward Council-i ashishir

Dimapur, Rongchii/April 22 (TYO): Mokokchung jila kübok Yimyu ward nung aliba NRL fuel station nung oil metre meshidaki amshiba asoshi Yimyu Ward Council ajanga Deputy Commissioner, Mokokchung nem ken o ka tezüluba nung agüja liasü.

Yimyu ward, Mokokchung nung aliba NRL fuel station nung oil metre meshidak alitsü südi ta kinük balala nungi mapang shia ashishiba nung ajemdaker ward council ajanga April 15, 2022 nü ajungbena tendanga liasü, ta zülu nung shia liasü.

Iba totzü ayokdak tesem nungi petrol litre asem (3) alir council ajanga junga asadangba nung litre asem ya 200 ml agi mabensa aliba nguteta liasü.

Iba nung ajemdaker ward council ajanga SDO Civil Mokokchung, EAC Ongpangkong aser Metrology department nemo sang agütsü.

Ketdangsürtem iba tesem tonga arur ano petrol litre pungo (5) alir asadanga liasü. Iba mapang litre pungo aiba gallon tepang tashi züokaka metre nung litre 4.98 dang sayua liasü, anungji iba fuel station yagi customer nem 20 ml tali agütsüba sayur, ta Yimyu Ward Council ajanga ashi.

Totzü anaben aliba nung balala sayuba ajanga totzü ayokdak metre meshidak amshiba tejangja sayur. Anungji ward council ajanga tim ketdangsür dang iba ken o kanga junga bushisüngdangtsü aser aibelener nem tapet temerenshi agüja nüburtem ashiokdaktsüba nungi kumzüktsü mepishir, ta ashi.