Totzü nung jenjang atuba atema Jayalalithaa-i sorkar aitsür

Chennai (Tamil Nadu), November 16 (Agencies): Yashi petrol aser diesel totzü nung jenjang atuba sülen tanü Tamil Nadu Chief Minister, J Jayalalithaa-i, excise duty reprangshiba ajanga Centre sorkar saru (revenue) angudang sensakertem nem khuret benloktsüogo, aser ibaji tim masü, ta sorkar aitsüogo.

Jayalalithaa-i, November ita nung diesel aser petrol nung excise duty ponguben tashi tuogo, sen 6.90 aser sen 8.35 tuogo, ta ashi.

“Iba ajangaji Centre sorkar saru angudang sensakertem nem khuret benloktsübaji tim masü,” ta lai sangdong ka ajanga ashi.

Yasüng ayaterm nungi petrol litre nung poisa 36 aser diesel nung poisa 87 atuba nung ajemdaker lai, jenjang atuba atema Oil Marketing Companies (OMC)-i India sen rupee aser US sen dollar jenjang nung temelenshi adokba ajanga lir ta kuli agütsüogo, ta ashi.

“Alima nungbo totzü jenjang nung temelenshi kangabo mali, rupee-dollar jenjang apir jenjang atubaji tim masü,” ta lai ashi.

Chief Minister-isa, tang tesütiba totzü nung jenjang atuba ajanga nüngdakba osettsüset aser chiyungtsü nung jenjang atutsü aser ibaji ajanga sensakertem kongshitsü, anungji jenjang atubaji meyipa reprangshitsüla, ta ashi.