Totzü nung tax ajemtsüla

Taoba ita Karnataka Assembly election agitsü aliba atema petrol aser diesel jenjang mereprangshii anogo 21 tashi aruba sülen May 14, 2018 nungi totzü company temi totzü jenjang reprangshia anogoshia poisa terara tuyonga arudar. May 14 nungi yashi tashi nung Delhi nung petrol litre nung sen 2.24 shi tua sen 76.87 kümogo aser iba ya linük nung petrol jenjang tasaktiba lir. Maneni diesel litre nung sen 68.08 kümogo aser iba ya-a linük nung jenjang tasaktiba lir. September 2013 nung petrol litre nung sen 76.06 ajungketa ibaji tasaktiba liasü saka Hombarnü totzü company temi poisa 33 ajungketba sülen India nung petrol jenjang tang tasaktiba kümogo. Yimya agi India nung totzü jenjangji New Delhi nung atetba jenjang nung ajemdaker asadanger saka Mumbai nungbo petrol litre nung sen 84.40 agi ayoker aser linük kübok jenjang tasaktibaji Mumbai nung lir. Kanga dang teratatsü aketba kaji India nungi petrol alizüka ayokba linüktem nung petrol jenjang dalangba agi ayoker. China dak alaka South East Asia nung petrol jenjang tasaktibaji India nung lir. Pakistan nung petrol litre nung sen 51.64, Bangladesh nung sen 71.54 aser Sri Lanka nung sen 63.91 agi ayoker. 2013-14 mapang crude oil jenjang barrel ka nung US sen $107 liasü saka tangbo barrel ka nung $70 lir saka petrol jenjangbo tasaktiba. Iba ya kechiba ta süra, tesüiba küm pezü tsüngda sorkari totzü nung excise duties aiben ajungketba agi petrol aser diesel jenjang tupet atutsüsa akümer. Taoba Prime Minister Manmohan Singh-i aniba UPA sorkari 2014 küm petrol litre ka nung excise duty agiba den sen 10 agi teimba tang Narendra Modi-i aniba DAN sorkari excise duty agir. Diesel nunga NDA sorkari taoba UPA sorkar dang nungi sen 11 teimba agir. 2013-14 matongdang aser sülen currency exchange jenjang aser tanga international onüktem ajanga totzü jenjang melenshitsüsa akümer saka tongtipangji sorkari excise duty talila ajungketba ajanga lir. Indian Oil Corp. Ltd ajanga ashiba agi, “May 21 nü dealer tem dang petrol litre nung sen 37.19 agi ayoker. Iba sülen excise duty 25.44%, dealer commission 4.72% aser VAT 21.26% bendenlokba ajanga tatem nung petrol litre nung sen 76.57 (Delhi) agi ayoker.” Asenoki iba ya jungjunga reprangdangra, sorkari petrol litre ka nung tax agibaji 51.44% lir. India nung kechisarena ajak Goods and Service Tax (GST) kübok dendaktsüogo saka totzü jenjang ang GST kübok medendaktsür. Tang ya excise duty + VAT inyakyim nung totzü jenjang lateter, iba nung excise duty ji Centre sorkari aser VAT ji state sorkari agir. Petrol aser diesel jenjangtem nung excise duty aser VAT den ano dealer temia tajangzük agiba dena lir. Asenoki excise duty aser VAT inyakyim reprangdangra diesel nung retail value dang nungi 66% agi teimba aser petrol nungbo 100% dak tema tax agir. India nung petrol aser diesel ya GST kübok dendaktsüra, totzü jenjang kanga ajema akümtsü. GST kübok 28% tax slab kübok totzü jenjang dendaktsüra, petrol litre nung sen 48.59 aser diesel litre nung sen 50.41 agi dang ayoktsü. Totzü jenjang atuba ajanga kechisarena ajak nung jenjang atutsüsa akümer aser nübortem timtemer. Atangji, Centre aser state sorkartemi nübortem asoshi inyaker ta süra aser talisa India nung sensaktia agientsü atema inyaker ta süra, parnoki totzü nung tax talitabungbo magitsüla mesüra tanga ama totzü ya-a GST kübok dendaktsütsüla.