Tou-ashiba hopta

Tou-ashiba Hopta nung benjungtepba nungi mangatettep, ashioktsüba nungi kechi ataloktsüar meshitet temulung tataba tatalokbatem lir. America nunger Protestant, Old Testament scholar aser theologian Walter Brueggemann-i Tenüngsang Ken indang onük ka jembidang, nisung taküm ka nung jangja metetba, rataba aser taküm tasen melenshiba tensatem ajurur aser item ajakji Tou-ashiba Hopta nung ataloker, ta ashi. Iba hopta nung asang tou amer “Hosanna” ta ayimdena ken atenba nungi “Khrista tanü shia aruogo, Halleluyah” ta asüba ken atener, saka iba kasa mapang nung asenok tamangertemi tamangba yimsü inyakyim nung mangatettep, ashioktsüba, temeten magütsüba, okrongba aser teimla makai akümba tatalokbatembo aiben züzüa toktsür. Asenoki asen mulungjang taroktiba nungi Tou-ashiba Hopta tenoktenoka agizüka mungra, iba hopta ajanga asen taküm khenyongi balaka melenshitsü akok. Tamanger aikati Palm Sunday aser Easter Sunday dak dang rangloker Tou-ashiba Hopta amunger. Hao asenoki Brihostibarnü Yisu Khrista ashioktsüba aser Good Friday nü pa kangki nung metaba tatalokbatem bilemteter, saka asenoki Tou-ashiba Hopta amungdang Palm Sunday nung Khrista shia aruba dak dang tulubalen rangloker amunger. Tou-ashiba Hopta nung Yisu-i tamangba yimsü aser sorkar ketdangsertem den mangatettep adokba indang densema lir. Iba hopta nung Yisu-i tenlaki merükteter aser tamangba yimsü tenüng amer rongsen bendenba shishilembartem meindokba Lai nung shia lir. Tou-ashiba Hopta nung Hombar nungi tenzüker Bodbarnü tashi asenoki asen tanela jenjang asadangtsü aser tasüngdangbatem alitsü atema maongka agütsür. Asenok tim masüba inyakyim kar nungi tajangzük angur asü? Asenoki Laishiba nung lateta aliba ozüngtem anema inyaksangshir asü? Arogo aser tamangba dak sendakba teloktemi tamangertem madak tashiyim amshia tajangzük angutsü meranger asü? Tsüngremi temulung lemtettsüsa asen lima nung metongshitsü aliba inyakyim kobasa? Tanü tamangba yimsü mesüra asen arogo nung Yisuia komala inyakyimtem agienla ta asenoki item anogo nung arokaroka asüngdanga shisadangtsüla. Tou-ashiba Hopta kübok Brihostibar anogo nung teimla aser süia aoba benjung aser külen senzüka toktsüba bilemtetdaktsür. Iba anogo ajanga Tsüngremi asen taküm nung temoatsü agütsüba teti bilemteta tenüngsang agütsütsü aser tarutsü atema teimla tajung yur alitsü tayongzükba agütsür. Iba anogo ajanga alima nung temenen tashitemi meimchirtem amokmerenba bilemtetdaktsür. Khrista senzüka toktsü süra, kodaser asenok meimchirtem azüngmeyak aser senzüka toktsüba nungi jenbua ali? ta Brihostibar anogo ajanga asenok nem tangatetba agütsür. Good Friday nung tajung kecha mali. Iba anogo ya reshikangshi aser sensamesatsüba anogo ka lir, saka iba anogo nung asenoki asen sasa ‘Yisu kangki nung metaba mapang ni-a kong lila?’ ta asüngdangtsü mapang tajung ka bener arutsür. Iba anogo nung asenoka Yisu atalatsüa pelateper telok nungji denla asü mesüra tamang katetba tetsür telok nung denla asü mesüra tasümait nütsüngtem den lila ta Good Friday anogo nung asen mulungjang nung shisadangtsüla. Yisu kangki nung angenloka metaba mapangji asen-a densema ali asübo, Yisu tango sademdang asen-ia kechi inyakla? Yisu asüba sülen asen-a koleni ola? Good Friday anogo nung aser iba sülen asen tamang jia kecha tia ka nung lila ta asenoki bilemdangtsüla. Honibar anogoji kechi ataloktsüar meshitetba aser temulung tataba anogo ka lir. Iba anogo nung asenoki asen tanelaren tsütsü telemtetba magiteti alibatem arokaroka bilemdanga telemtetba agitsüla. Tatemsa Easter anogo ajanga asenok nem tepela tulu bener arutsür aser Yisu Khristaji asen kümtetdakba ta teimla agütsür. Shinzüka yutsüba ama asen kibuba Yisu Khrista alima aru aser pa teinyaktsü inyaker Kotak-i tebu dangi ogo, saka pa tanaben meyipa arutsü aser idangjibo taochi putu süitemer alitsü. Anungji, pa marudang asenoki mapang tajung alangzükdi, taküm Tou-ashiba Hopta ya asen taküm nung temelenshi anguba hopta ka asütsü aser asen tanela jenjang renemshiba mapang ka asütsü ayongzüker.