Abelen tebur kentener telok Lenjeter aser achji Mayangnokcha govt Hr Sec School (MGHSS) Choir tem angur.
Mokokchung, July 17 (TYO) : Tang tensa teyari agütsütsü atema kenten sentong akaba rongnung tan Honibarnü Mokokchung Municipal Council Shopping Complex nung nükjidong ka atema ayonga akaba kenten sentong ya takok anguba tulutiba rongnung ka asütsü. Iba sentong nung kentener telok balala 30 den tsüngsangertemi shilem agi.
Touch Jorhat free concert sentong ya ‘Know thy neighbour’ omen nung ajemdaker ayonga aka aser iba sentong takok anguba ya jila nung dang masü saka kidanger state, Assam nunga kanga tenüngsanga jembiogo.
Aor den küm aika tejakdang nung tesentaktep tajung nung lia aruba Jorhat district, Assam nung aliba nüburtem tzümetsüng agi kongshir alirtem nem teyari agütsütsü atemtetba ya online post ka ajanga tenzüka takok ngua inyaktetba lir.
Iba sentong Ao Milen, All India Radio, The Morung Express, Eastern Mirror, Nagaland Page aser Mokokchung Premier TV teloktemi kanga mulungsoa ajungkettsüogo.
July 16, 2016 nikongdang (Honibarnü) Mokokchung nüburtem ajaki pei tajungtiba agi timtema alir yaritsü kanga mulungsoa shilem agiba maparen ka ajangshiogo.
Iba sentong nung NGOs aser lokti balalai jaokba ama kanga shishia bilemja rongsen aser teyari balala agutsüba ajanga iba sentong kanga takok ngua agitetogo. Ita shia amenba DPDB senden, July 15, 2016 nü amenba mapang ‘Touch Jorhat’ project atema rasaa jembiba atema sentong ayongertemi kangasa pelaba metetdaktsü.
Iba sentong akatsü anogo ka lia jila nung 5MVA transformer raksaba den tzünglu maneni aluba ajanga sentong jangjongtsü ama liasü, ajisüaka tetsüdangba tulu melii sentong takok ma nung agitetogo.
Light tashi maitba ajanga sentong gondha ka dak tera tali agi menurang tenzüktet, ajisüaka nüburtemi kanga aremzüka aser süngjema ataba ajanga ILM Touch Jorhat sentong takok angu.
Stereo Freaks tsüngsanger teloki kang junga shilem agiba sülen Lenjeter teloki Mokokchung tushiba ken ka atenba ajanga nüburtem mulungjang nung kanga kongshi.
Iba sentong nung School of Music, Mountain Beat Music School, The Mayangnokcha Govt Hr Sec School choir aser tebur kentener telok tejen ‘Huntingboots Inc’ nungeri shilem kanga junga agi.
Nagaland Hornbill Intl Rock Contest, 2015 nung best band sempet angur, Tune Up Channel telok-i shilem agiba mapang nüburtem kanga ajungmeso aser tatemsa Funk Fuzz band-i funk rock music ajanga sentong tobur junga tembangtsü.
Ajak liaka Mokokchung nung sempet tajung aketer aika dang lir aser parnok dak tangar den yariteptsü kodanga atsüng ayong masüba yimyaji kecha dena atishitsü makok.
July 17, 2016 nu (Deobarnü) sentong ayongertemi shopping complex merükteta amungba mapang Gorkha Students’ Union, Mokokchung aser Trailhounds Cycling Club temi kanga mulungsoa yaritep.
Touch Jorhat project nung aruba tenla ajak committee kati audit asütsü aser iba sülen ketdangsertem ajanga Assam Flood Relief fund nem agütsütsü.
You must be logged in to post a comment Login