Tour de France: Cavendish-i Stage 6 kokogo

Montauban, July 07 (Agencies): Britain nunger cycle toktepa anishir, Mark Cavendish-i kilometer 190.5 talang alizüng mezüng tonga tang tagidak Tour de France tetoktepba Stage 6 tanü, Brehostibar nü kokogo.
Tan takok anguba ya Cavendish-i tan tetoktepba nung Stage takokba 3 buba aser ajak agi Tour de France Stage takokba 29 buba angur lir.
Tanü tetoktepba nung Cavendish sülen anidak, Germany nunger Marcel Kittel-i 2 buba aser külem sensopur, Daniel McLay-i 3 buba jenjang ngua liasü.
Cavendish-i tan Stage takokba anguba sülen taoba mapang Tour de France takok marok 5 ben tashi agizüker, France nunger Bernard Hinault ajangteta Stage takokba timba angur tarensen nung 2 buba kümogo.
Taoba mapang cycle toktepa anishir, Belgium nunger Eddy Merckx-i ajak agi Stage takokba 34 tashi koka, 1 buba jenjang ngua lir.
Ano külen, Belgium nunger Greg van Avermaet-i overall shilem nung temaba jenjang ngua maneni yellow jersey asemtsü temeten anguba osang jangjaogo.
Pa sülen anidaka, France nunger Julian Alaphilippe aser Britain nunger Chris Froome nati overall shilem nung 2 buba aser 3 buba jenjang ngua lir.