Paris, July 15 (Agencies): Britain nunger Chris Froome-i 3 buba Tour de France takok marok agizüktsüsa tang tagidak 2016 Tour de France tetoktepba nung tanü, Hokolbar nü kanga junga shilem agiogo.
Tanü Stage 13 tetoktepba time trial nung Netherlands nunger Tom Dumoulin-i alizüng mezüng tonga tetoktepbaji akok.
Dumoulin-i minute 50 ser second 15 nung kilometer 37.5 talang alizüng mezüng atong aser pa sülen anidaka, Froome-i minute 51 ser second 18 nung alizüng tonga tanabuba jenajng angu.
Tena sülen anidaka, Portugal nunger Nelson Oliveira-i minute 51 ser second 46 second nung alizüng tonga tasembuba jenjang ngua liasü.
Tan takok anguba ya Dumoulin-i tan tetoktepba nung tanabuba stage akoker lir.
Tanü tetoktepba nung 2 buba jenjang anguba sülen Froome-i overall shilem nung 2 buba jenjang abener, Netherlands nunger Bauke Mollema den minute 1 ser second 47 agi temaba jenjang ngua, maneni nungtugu yellow shirt asemtsü jenjang angur lir.
Froome aser Mollema na sülen anidaka, Britain nunger Adam Yates-i overall shilem nung 3 buba jenjang nguogo.
Tanü Bourg Saint-Andéol nungi La Caverne du Pont-d’Arc tonga tetoktepba tenzükba jakdang yasüng France kübok Nice nung atalokba lendong nung asürtem nem aküm agüja tetoktepertemi minute 1 tashi ola madoki aküm agüja liasü.
“Tanü timtem kecha majurui tetoktepba takok ngua agitetba atema kanga pelar. Tang mapang ya asenok ajak lungjema alitsü mapang ka lir. Tanü tetoktepertemi kanga meranga toktepogo saka onok ajak indang temulungjang nung Nice nung alirtem asoshi bilemja liasü,” ta Froome-i tesülen metetdaktsü.
You must be logged in to post a comment Login