Tour de Hills 3 takokba nung tembangogo

Nagaland Parliamentary Secretary, Agriculture, Dr. Benjongliba-i Mokokchung kübok Imkongmeren Sports Complex nung Auto Cross 3 tetoktepba tanü Hokolbar nü tenzüktsüba noksa nung angur. Adventure & Motorsports Association Mokokchung (AMAM)-i kümshi ayongba tetoktepba sentong ya anogo 2 tashi agitsü ayonga lir. (Mokokchung, November 06)

Dimapur, November 06 (TYO): Mokokchung jila küm 125 tain akümba nüngtem nung Adventure & Motorsports Association Mokokchung (AMAM) teloki ayongba Tour de Hills 3 tetoktepba sentong Mokokchung nung tanü Hokolbar nü tembangogo.
Tan sentong nung shilem agirtemi Mokokchung district kübok densemba administrative block ajunga sema jaja aser parnoki Mokokchung jila 125 küm tain akümba salem osang aser taruba December ita Mokokchung nung agitsü ayongba quasquicentennial benjungmong nung adentsü jaokba osang lemsatepa liasü.
Tan sentong ya Time Speed Distance (TSD) tetoktepba aser Jubilee Adventure Trail ta ajaba tesem balala repranga jajatsü sentong densema, yimya ana tashi lemsar agiba osang jangjaogo.
TSD tetoktepba sentong nung ajak agi nisung 15 tashi shilem agi aser parnok rong nung Tali Akang o Mulinath Gosh nati mezüngbuba; Rajiv Sarkar o Gairick Khan nati tanabuba; Waimeren o Sanen nati tasembuba; Kavi o Neihu nati pezübuba aser Lanusünep o Tzüdiyong nati pungobuba jenjang ngua liasü.
Ano, Lanuinla o Lina Sumi nati Best Disciplined Team; Wapang Kichu-i Best Decorated Car; Achen Longchar o Limala Aier nati Best Couple aser Spearhead teloki Best Institution/Team sempet angu.