Tour de Hills 3 tetoktepba November 4 nü tenzüktsü: AMAM

Dimapur, October 28 (TYO): Mokokchung district sorkar, MDSC aser MDACC nunger den külemi lungjemer Adventure & Motorsports Association (AMAM) teloki ayongba Tour de Hills 3/ Jubilee Adventure Trail tetoktepba Mokokchung kübok Imkongmeren Sports Complex nung taruba November ita 4 nü Mokokchung Deputy Commissioner-i tenzüktsütsü sentong renemba osang ka AMAM-i tanü sangdong ka ajanga metetdaktsüogo.
Mokokchung jila tenteter küm 125 ajungba nüngtem nung ayongba tetoktepba ya TSD yimya nung tokteptsü shilem ka aser oda shilem agiba shilem ka küma lemsar anogo 2 tashi agitsü ayonga lir.
Iba sentong nung shilem agirtemi yimtsüng 45 densema Mokokchung district kübok densemba administrative block 10 prongla ajanga kilometer 300 shi gari anir jajatsü.
Parnoki ajangba yimtsüng shia nung jubilee salem osang aser December ita 14-16 nü tashi Mokokchung nung agitsü ayongba benjungmong nung shilem agitsü asoshi jaokba osang lemsateptsü.
Tayongeri sentong nung shilem agir ajunga anepalutsü renemba yong shilem agir shia nungi tenüng züluoktsü taa sen 4000 agitsü renema lir.
Ano, iba sentong nung shilem agitsü jangrar jenti akümba yong tenüng züluoktsü anogo tan October ita 31 tashi tayongeri atsülangshitsüogo.
Ano külen, taruba November ita 6-7 nü tashi 3 buba Mokokchung AutoX tetoktepba sentonga Imkongmeren Sports Complex nungsa agitsü ayonga lir.