Tourism Adviser Khehovi-i Wokha semdang

Wokha, Chiteni/July 04 (TYO): Tanü Tourism Adviser, Khehovi Yepthomi aser Tourism Secretary, T. Mhabemo Yanthan na den Directorate of Tourism nungi engineering wing aser ketdangsertemi Wokha district aser Doyang na nung Swadesh Dharshan kübok project mapa balala inyakba semdanga liasü, ta ketdangsertem osang ka ajanga metetdaktsü.
Parnoki Pangti yimdak semdanga tang teinyakdak mapatem repranga liasü, kechiyong taküm-a state-i Amur Falcons agizüktsü; Küm shia Siberia nungi Amur Falcons (molulem ozü) million aika arua Pangti yimdak amonger.
Parnokisa Doyang nung Tourism kübok tang teinyakdak terenlok mapatem semdanga liasü, aser item rongnung- huts, cafeteria, water sport area aser recreational activities densema lir. District nung molulem reprangtsü atema talisa, October, November aser December itatem nung raliwalir aikati iba tesem semdanger, aser parnok anepalutsü atema terenlok mapa balala inyakdar.