Tourism ajanga Nagaland renloktsü

Kohima, September 27 (TYO): Bodbarnü World Tourism Day amungdang Nagaland nung tourism ajungkettsü atema tourist tem aruba inyakyim timi anepalutsüla ta jembi.
Tourism Department-i “Sustainable tourism – A tool for development” omen nung ajemdaker Kohima nung World Tourism Day ayongzüka amung.
“Tourism ajanga asen state indang rongsenkettsüng jenjang ajungkettsü atema asenoki raliwalirtem aruba inyakyim timi anepalutsüla” ta Richard Belho-i tanü sentong nung jembidang ashi. Pa ya entrepreneur ka aser Naga nunger lanurtem ajungkettsü atema mapa inyaker ka lir.
Nagaland nung home stay dena tourism facility tem tajungba akümtsüla aser domestic o foreign tourist tem atsür arutsü atema annual calendar ka nung sentongtem, kin balala indang benjungtem aser tanga tongtipang tatalokbatem enoker adoktsüla, ta Belho-isa ashi.
Tourism ya kanga dang kara ainba shishilembabaren ka lir ajisüaka Nagaland nung Hornbill Festival mapang aser tongti benjungtem nung sobaliba sentongtem chichiba nung sayutsü merangtsüla, ta paisa shisem.
Sentong nung Tourism Department Deputy Director, Ajanuo Belho-i United Nations World Tourism Organisation Secretary General, Taleb Rifai-i züluba shidi zünga metetdaktsü.
Maneni, St Joseph’s College Jakhama nung Tourism Studies Lecturer Martha, Nagaland Tourism Association züngsem Neinuo Zhasa aser Lalhou’s Home Stay kibur Mezhusieno Beio nungertemia parnoki ajangshia aruba osangtem lemsatep.
Sentong nung Assistant Director Sentimenla-i tesentepertem pela agizük, Zawe Thopi & Amos Kent aser Ale Metha nungertem ken aten, Mt. Sinai Higher Secondary School Zaseto Sasu-i temoatsü meshia sarasadem aser Deputy Director Keduosie-ü M Rio-i anküp tepela o jembi.