Tourism ajungkettsü rangloker inyakang: Arunachal CM

Itanagar, Rongjui/September 26 (Agencies): Arunachal Pradesh chief minister Pema Khandu-i state nung tourism ajungkettsü asoshi rangloker inyaktsü atema ketdangsertem dang shiogo.
Itanagar nung Bodhbarnü department lepareprangshiba senden ka nung Khandu-isa ketdangsertem dang terenlok tasen nung dang temulung magütsütsü shiogo.
Pai ashiba agi, Tourism department indang asset tem timba ka amshi ajungtsü majungtsü mejangja aser individual-centric schemes tem ajanga inyakba osang ajanga angazükogo.
Pai department nungi ketdangsertem dang kechi mapa tongtibangtiba iba nung rangloker inyaktsü shiogo, koba tourism ajungkettsüba lir aser kiojen yangluba maparen ya engineering department nem tokjang ta shiogo.
State nung tourism tsütsü lenmang sadema lapoka liaka department-i tejakleni bener motetba tebilemtsü pai lemsatepa liasü.
Tesem balala nung asset tem mamshi yua aliba dak sendakba nung Khandu-i tourism department ketdangsertem dang item ya jangja shir Forest, PWD aser PHE amala department tem nem agütsü ajungtsü majungtsü asadangang, ta shiogo.
Paisa, project tembanga minyaki aliba tem indang report agütsütsü tuyuogo.
State sorkari item asset tem ajanga tajangzük angutsü mangutsü aji asadangerang senotsü teyari agütsütsü, ta chief minister-i shiogo.
Chief minister-isa, Centre-i Northeast nung tourism ajungkettsü atema rangloker inyakdar anungji taruba kümtem tsüngda Arunachal Pradesh semdanger tourist aika akümtsü, ta ashi.
Maneni, raliwalir tem dak sendakba nung local tem tebilemdangba melenshitsü ayongzükba den pai district tourism officers (DTOs) tem dang nüburtem nem tangar agizükba aser anepaluba ren nung tangazükba balala agütsütsü ashi.