Tovihoto aser DCCI-i Pannalal Sethi mang ayimer

Dimapur, May 16 (TYO): May 14, 2017 nü Pannalal Sethi asüba osang angashia aoksar aser temulung raksar, ta Economics & Statistics, Parliamentary Secretary, Tovihoto Ayemi-i metetdaktsü.
Dimapur aser state asoshi Sethi-i mapa tajung jenti inyaktsüogo aser nübortem tenzükogo. Shishilembar mongin ka ama, pai entrepreneur aika nem shisatsü aser teyari agütsü aser tanü parnok amenteta lir, ta Tovihoto-i asür kinungtsü dangi züluba shidi nung shia lir.
Asür Sethi-i lokti aser tamangba yimsü dak sendakba rejutem nung shilem agiba dang masü saka pai küm 10 tema Nagaland Pradesh Congress Committee nung züngsem tajung ka liasü. Pai iba akümli toktsür aobaji nür kibong atema dang masü saka lokti atema takoksa tulu ka lir, ta paisa shisem.
Dimapur Chamber of Commerce & Industry (DCCI)-ia sangdong ka nung May 14,2 017 nü Varanasi nung Pannalal Sethi asüba atema temulung raksar ta metetdaktsüogo.
Pai Dimapur nung lokti atema aser shishilembartem atema mapa tajung aika inyakogo aser shishilembar ka ama, pai entrepreneur aika len ania ajungkettsü, ta Grievances Cell, DCCI, Convenor, Akashe Zhimo-i sangdong nung shia lir.
Pa asüba ajanga Dimapur nung shishilembartem atema takoksa tulu ka ajuruogo. DCCI-i asür kibong den asüku lemsateper aser parnok nem tashi aser tesünep agüjang ta sarasademtsür, ta sangdong nungsa metetdaktsü.