Tovihoto Ayemi-i Police colony nung gari lenmang lapoktsü

Honibarnü Police colony, Dimapur nung gari lenmang lapoktsüba sülen NIDC Ltd. Chairman Tovihoto Ayemi, DMC CEO H Atokhe Aye aser tangartem külemi agiba noksa angur.

Dimapur, December 12 (TYO) : Police colony nung alirtemi mapang talangka nungi lenmang yangludaktsünüa arur Honibarnü Nagaland Industrial Development Corporation Ltd. Dimapur, Chairman, H Tovihoto Ayemi-i lenmang yanglushiba lapoktsüogo.
Iba sentong nung Tovihoto-i Dimapur Municipal Council (DMC) nem tenüngsang agütsü aser maneni terenlok mapa inyaktsü ayongzük.
NPF-i aniba DAN sorkari terenlok atema aser nübor asoshi mapa inyaktsü tenangzükba agia lir. Terenlok mapa inyakba ajakji nübortem asoshi lir anungji nübortemi pei indang ama bilema aangtsüla aser anepalutsü tim, ta Tovihoto-isa ayongzük.
Dimapur Municiapl Council CEO, H Atokhe Aye-i ashiba agi, state sorkari acha-ayanga January 2015 nungi DMC nem toll tax sarutsü temelaba agütsü.
Toll tax nungi sarutetba sen tera ajanga DMC-i Dimapur nung alirtem asoshi nüngdakba mapa inyaktsüteter, ta paisa shisem.
Police colony nung lenmang yanglushia lapokba züngsema DMC-i Dimapur nung gari lenmang 11 buba yanglushiogo. Iba den külemi tesem balala nung dustbins aser drainage/culverts nungertem yangluogo, ta DMC CEO-isa metetdaktsü.
DMC-i maneni jila renlokdaktsütsü atema mapa inyaktsü aser nübortemia DMC aser state sorkar nungita aser amalitep lia yariteptsü mepishir, ta paisa ashi.
Sentong nung Police colony GB-i o jembidang, DMC aser state sorkar nem tenüngsang agütsü. Dimapur Chamber of Commerce & Industry (DCCI) President Hokivi Chishi-i o tatsüka jembi aser Badra, EE, DMC-i anküp tepela o jembi.