Town nung alirsa memerükba !

Temelenshiba lima nung temelenshi kaji akhidangbo yimtaklirtem dangbo town nung alirtem kanga agia temerükba liasü, saka tanü asüngbo town nung alirtem dangbo yimtaklirtem kanga agia temerükba kümogo. Ibaji kechiba ta bilemdangra, town nung lia lia town nung alirtem pei agitsü onsara meteta akümnungji rongsen kanga penbur aser pei ki aser kima alema pei nük agi mangur. Aji oda, town nung alirtemi ozü jangratema lira ojang, ozü ki jungra ojang, ozü kima merüka yura ojang ta bilemba tangatteba agi pei kibo onsara ajung aser pei kimabo temerük saka pei yimdongbo janona toktendak ama kümdaktsür teshinema menema anogo shia oli aruli ta ajanga senzüteper. Aji oda, town nung alirtem yimdong onsara majung aser memerük asünungji tanü asüngbo nisung aika mozü kidang tashidak tamajung aketer anepalur amato sü agi teni nembanger senzüya angutsü. Yimdong yangluba nunga yimtak yimtsüngtemsa tajungba angur. Yimtak lenmangtembo auyi maponger aser lishi madoker saka town lenmangtembo onsara majung nungji gari nung senzüa majung aser tetsüng agi senzütsülaa masü ta tangar dang sayutsülabo masü ka jenjang nung town nung alirtem litepdagi. Tangalen bendang balala nung azünger lanurtemi pei medemer asen lima reprangi anir arunür saka pei yimti yimdong lenmang majungba mesayunüba agi anir marur. Iba ama tia ka nung asenok town nung alirtem anogo shia pei agitsü sen bushiba mapa nung mapang tatsükata anisüngzüka menguteti pei yimti yimdong lenmang tamajung ser iba tezülen janaona tokdena akabajibo mangu amai oli aruli senzür. Aji oda, pei kima telongbo temerük saka yimdonglenbo memerük janaona toktendak amai küma aobaji asenoki kecha hau ta mali aser akseta mebilemer. Iba jagi tangari janatsübaji jashiseta repranger okdoktsü melen, tangar kintemjibo yutsür,  asenok Aotsür Aor  aikati pei kidang aser pei kima telonglen janaba anakona ajak bendena polythene bag tulu nung seper bener oagi tangar kima endoker. Ni Dimapur nung alir asünungji aiben yimtakleni aodang yimtsüngtem yimdong ngur pelar aser kodang Dimapur-i meyipa arudir Dimapur yimdong ngur jashir aser ano Kohimai atudangbo Kohima yimdong agi nümamedangteti bilemer. Ano, tanga tesem ajakji ken toktsür asenoki kaketreju aser mozü ki anasa pei kidang nungi janaona okdena bener oa endoker. Tatishitsü ka, Dimapur nung Dimapur Govt. College ya National Highway anasa tesem tajung ka nung lir. Ano, tangbo akhidang iba college nung azüngertemi yanglutsüba college gate tajung ana lir, item jagi college campus meraketdaktsür aser kaketshirtema meraketketa senzür. Ajisüaka, college atsüzüng nung National Highway tezülen koba kiyong aser koba kidang nungi bener arua endokar memetet anepdang aonung shia janaona polythene bag nung seper arua endokba agi shisatsü angazükba tesem masü saka janaona endokdak tesem amaiang ka mesüka kümdagi. Kong südirsüaka asenoki jungjunga bilemdangtsüba kaji, asen kidang nungi janaona okdena bener oa tangar kima mesüra tangar ki anasa mesüra anogo shia nisungtem senzüba lenmang tezülen endoktsübaji kecha tetezü maka. Asenokji tangar kima yimdong menentsür akümer. Merükmejua alitsüba maparen nung ya kima yimdong topur junga merükmerüka alitsübaji kanga tongtibang, kechiyong kima yimdong merüka aliba jagi memeteti asenok tangar bendanger süisüponger tsüngdang akhüm  atur. Aji oda, tang nungibo town nung alirtema pei kilong dang masü saka yimtaklirtem ama pei kima yimdong dena merüka alitsü asoshi kanga temulung agütsütsüla. Town nungbo Municipal aser town council-i jana bendendak tesem balaka shimteta yuja lir, anungji timtemaka nisung ajaki iba ama tesemji bushia oagi endoktsüla aser municipal aser town council-ia akok tashi nübortem nem pei alidak merüka topur junga ayutsü tangatetba agütsütsüla.