Town nung election

Nagaland state government-i tang ya Nagaland nung küm ishika Municipal aser Town council election magii aruba agitsü merangdagi. Aji oda, iba election agitsü asoshi maparen tenzükogo aser taruba 2017 küm January tatembanglenbo agitsü amai reprangtetter. Ajisüaka, tang ya tesem aisü nung iba election ya magitettsüsa ken o tasak benoka lir. Kari Municipal Act nung lateta akaba saru magütsüner aser kari tetsürtem nem 33 % shilem magütsüner, anungji item ozüngtemji magien tashibo tesem aika nung government-i election aginüyonga magitettsü. Atangji, municipal asüyonga mesüra town council asüyonga nübortem ajungtsü asoshi tentetba yimten lir, anungji nübortemi election agitsü memulungra kangshia agitsüa menüngdaker. Ajisüaka, nübortemi angatettsüba kaji tanü putu yabo government kijai nübortem nüngdak ajak reprangba putu masü saka nübortemi peisasa pei alidak aser nüngdak repranga anepaluba putu ka kümogo. Joko, electricity, water supply aser public transport mapatem ya government-i anepalu mesütettsü, anungji private teloki dang reprangtsüsa akümtsü. Government mapajibo ozüng aser inyakyim lateta yutsütsübaji dang asütsü. Iba amaji town nung alirtem balaka joko government-i lenmang dena meyanglutsütet kümogo, anungji municipal aser town council maliyonga pei pei kiyong aser mepu nung temulunger tenla saruteper lenmang aser kilentsü yanglur. Ibaji nübortemi peisasa pei saru agi pei alidak yimkong ajungtsü bilema inyakba mapatem lir. Aji oda, municipal aser town council ajanga nübortem dang saru sarur pei alidak tesemtem nung nüngdak inyaktsübaji sensosangertemi tim masüba mapa ka inyaker amato mebilemtsüla. Tang tatishitsü ka amshidi süra Dimapur Municipal Council ya ka asütsü. Dimapur nung municipal election agir ward shia nungi züngsem shima mali saka Municipal Council-bo lir, anungji idakji government ketdangser ka mendenbuba südaktsür municipal mapa inyakdaktsür. Iba ketdangser jagi Municipal Act nung shia aliba ama ki shia saru sarur aser iba saru jagi lenmang aser kilentsütem yangluja aor, anungji Dimapur  nung state government-i reprangba lenmang dang nungibo Municipal Council-i reprangba lenmangtem tajungba asütsü. Iba kasaji Kohima aser Mokokchung nunga lir, anungji election magir dang ashi, ozüng lateta lir asünungji Kohima, Mokokchung aser town-tem ajak nung council tenteta lir iba council mapaji government ketdangser kati dang repranger, iba jagi tedongzüng nung alir nübortemi shilem magitetter. Nübortem asoshi takoksaji aji lir. Atangji, asenok dak tashi mait kaji municipal aser town council election nunga tim masüba mapa ajak benoka election tetsübutsüka agir. Aji oda, municipal aser town council nung inyaktsübaji senotsü tulu ajangzüktsü atema business ka tenzüker amato iba election  nung ya senotsü kanga endoker. Ibayongji, election agir akümba council nung züngsemtemi pei ward aser pei town ajungtsü bilema masü saka pei atema senotsü tajangzük bushir amato inyakba ngua aruogo. Iba jagi nübortemibo election magii dang tang amai administrator kati dang council mapaji reprangdaktsüner. Ajisüaka, mepu (ward) nung teshimtet pur kata mali ser municipal aser town council mapa ajak administrator kati reprangba nungji tapok aika adoktsü aser nübortem akoksatsü. Aji oda, pei kiyongji tangar dang nungibo pei-i temeimba asütsü, anungji peisasa anepaluba tajungba asütsü. Iba tangatetba nung saru saruyonga kecha masü, kechiyong iba jagi asenok yimdong aser nüngdak ajunga anepalutsü ta bilema municipal aser town council election ya agitsüla. Tetsürtem nem 33% shilem agütsübaji asen sobaliba aser yimten tsütsübo shitak masü saka yimtak putu menden nung shilem agidaktsütsü jembir masüji municipal aser town council nungbo khen tendanga tetsürtem nema 33% shilemji agütsü nunga tajungba asütsü. Tetsür asüyonga alima aser nübortem meimba aser Tsüngrem metetba süra teburtem dang nungi tajungba inyaktettsü. Tangbo, government mapa nung teburtem dang nungibo tetsürtemang ochimashiba ta puteta lir. Ibaji Nagatsürtem ajak asoshi khuret aser tayongzükba tuluka asütsü.