TR Zeliang aser Dr Shurhozelie na longjemtsü

Kohima, December 8 (TYO): Naga People’s Front (NPF) sasep nung mangatettep adoka aliba onük atema Nagaland Chief Minister T R Zeliang aser NPF President Dr Shurhozelie Liezietsu nati putepshitsü aser longjemshitsü atema tezüluba ka nung sign süogo ta osang angazüker.
Taküm July 19 nü NPF MLA 39-i taoba Chief Minister Dr Shurhozelie-i aniba sorkar anendaktsütsü atema TR Zeliang den aden. Iba ajanga NPF sasep nung telemsa adok aser Lok Sabha MP & taoba CM, Neiphiu Rio president sür NPF party tanga ka tentettsüsa tensa ajuru.
Taonung NPF telok anaprong nungi osang angazükba agi, T R Zeliang aser Dr Shurhozelie nati tanü chichiba tangatetba nung putepshitsü aser longjemshitsü agizüka sign asü.
Ajisüaka, iba atema telemtetbaji taruba anogo ka ana tsüngda ang agitsü akok, ta osang ajangasa shisem.
Health & Family Welfare Minister, Imkong L. Imchen-i osangbener dang ashiba agi, Naga yimten latettsü mapang tonga aruba ajanga iba mapa ya inyaktsü tenzük. Minister Imkong ya TR Zeliang-i aniba telok nung dena lir.
Ano putepshitsüba atema tanga kuli kaji, Election Commission of India-i NPF constitution nung lateta aliba ama ken o angatetteptsü tetuyuba agütsüba atema lir, ta Imkong-isa ashi.
NPF sasep nung putepshiba ajanga Rio tir sür TR Zeliang dena NPF MLA 36-i pusemba telok tazüngla akümtsü, ta osang ajanga metetdaktsü.
Ajisüaka, Neiphiu Rio-ia putepshitsü mulunga agizükogo aser pai tir menden nungi anenogo.