TR Zeliang den Neiphiu Rio na NEDA sentong nung aden

Dimapur, September 5 (TYO): Mongulbarnü Chief Minister, TR Zeliang den Lok Sabha MP & NPF President, Neiphiu Rio aser NPF Manipur President, Awangbow Newmai nungertemi North East Democratic Alliance (NEDA) 2 buba Conclave nung aden.
Iba sentong ya Maharastra Sadan, New Delhi nung ayonga agi aser BJP National President, Amit Shah; BJP National General Secretary, Ram Madhav; Dr. Jitendra Singh, MoS for DONER, Kiren Rijiju, Union Minister of State for Home, Dr. Himanta Biswa Sarma, Sarbananda Sonowal, Pawan Kumar Chamling, Pena Khandu, Biren Singh, Zoramthanga, Neiphiu Rio, Atul Borah, Hagrama Mohilary, Paramananda Chayangia, Paul Lyndoh, Conrad Sangma, Rajen Gohain aser tanga tongti lennir aika aden.
CSS schemes tembangba yong Nagaland nung Hindi tesayur 2000 shi ka mapa nungi agientsüsa tia ka nung lir, anungji iba onük atema Centre sorkari teyari balaka agütsütsüla, ta senden nung TR Zeliang-i ashi.
Tawa Prime Minister, Narendra Modi-i Assam semdangdang TR Zeliang-i Nagaland nung tzünglu aser tzümetsüng ajanga timtem balala ajuruba osang lemsatepa liasü aser tanü senden nung paisa Prime Minister-i nangzükba ama teyari agütsütsüla ta nenshia metetdaktsü.
“Nisung taküm samaba den kiojen aser rongsen aika samaogo aser iba atema tangsatang teyari agütsütsüla. Nagaland sorkari kobi melii iba dak sendakba comprehensive plan ka agütsütsü” ta Nagaland Chief Minister-isa metetdaktsü.
Nagaland nung air connectivity junga maliba atema TR Zeliang-isa iba dak sendakba maparen ajungkettsüla ta ashi.
“NE tesem nunga Visa Checking System tenzüktsüla aser iba ajanga South-East Asian linüktem den shishilembaba maparen tezübaba akümtsü aser sensotem tiptema senzüsenbongtettsü. Visa Checking System maliba ajanga tang Northeast nung tourism, trade & commerce nung timtem ajurur” ta paisa shisem.