TR Zeliang-i 2013-2014 budget deficit shitak metetdaktsütsü akhanger

Dimapur, Metsüremi (March) 28 (TYO): March 31, 2014 tashi nung budget deficit shitak magütsüi dang Nagaland assembly nung Budget agizüka yuogo, ta Opposition lennir TR Zeliang-i NLA Speaker dangi shidi ka zülu.
Metsüremi (March) 26, 2018 nü assembly nung budget atema olemtepdang pai Chief Minister dang March 31, 2014 tashi nung deficit aliba osang metetdaktsütsü asüngdang saka iba osang tejangja meshii dang Budget agizüka ayu, ta TR Zeliang-i züluba shidi nung shia lir.
Nagaland Governor-i assembly nung o jembidang 2013-2014 atema RBI-i sangdongba osang masü saka asadangtetba osang ang metetdaktsü. Ajisüaka, Chief Minister-i iba onük jembiba nai agizüka ayuba ajanga Opposition aser Treasury Bench züngsemtem ratateper. Anungji, nai Chief Minister dang tekaratiba nung deficit osang shitakba metetdaktsütsü atema tetuyuba agüjang ta mepishir, ta TR Zeliang-isa Speaker dang ashi.