TR Zeliang-i ACAUT mulungtet nübotem dang pelaba metetdaktsü

Kohima, October 31 (TYO) : ACAUT mulungtet nübotem tanü anüngdang Kohima tonga aru aser parnok den ajurutepa jembidang Nagaland Chief Minister TR Zeliang-i tenüngsang agütsü.
“Naga nunger lokti atema aser nükjidong tajung atema nenoki Chumukedima nungi Kohima tashi tetsüng agi aruba atema kanga pelar. Taoba mapang nenoki ‘Sorkar ka, Saru ka’ ta yimyim ayimokja liasü saka tang nenoki ano ‘Ochimashi maliba lokti’ ta yimyim tasen ka ayimoktsüba pelashishia agizüker. Nenoki inyakba mapa ya kanga tajung aser lokti nung nisung ajaki pusema nungittsüla” ta TR Zeliang-i ashi.
“Sorkari nübortemi teyari medeni lokti nungi ochimashi magientettsü aser nenoki iba mapa tenzükba atema pelar” ta paisa ACAUT mulungtet nübotem den ajurutepdang ashi.
“Ni aniba sorkari LokAyukta ka tentettsü mulunga lir aser iba asoshi mapa teinyakdak lir. High Powered Committee-i bushitetba osang agütsüba sorkari kanga junga reprangdar aser Committee-i junger ta ashibatem mapa küma inyaktsü asoshi sentong atongdar. Committee-i agütsüba osangji aika dang anungji item ajakji reprangshimtsü atema mapang agitsü, ajisüaka nüngdakbatem inyaktsü ta ni nenok dang nangzüker” ta Chief minister-isa metetdaktsü.
Hokolbarnep ACAUT-i Chumukedima nungi Kohima tashi ‘Ochimashi Anema Jajaba’ sentong tenzük aser parnok yasüng Piphema nung anenzükba sülen tanü Kohima atong.
Tanü Chief Minister-i pa indang office nung Security Coordination Meeting ka ayongzüka agi. Iba senden nung Chief Secretary, Home Commissioner, Additional DGP, IGAR, aser SIB o CRPF nungi ketdangsertem aden.
“Hornbill Festival mapang Union Minister ka mesüra tanga VVIP aika anogoshia tongti tesemdanger ama shilem agitsü sentong lir anungji iba benjung mapang state nung tensa junga lidaktsünür” ta TR Zeliang-i security ketdangsertem dang ashi.
Chief Minister-isa Kohima aser Hornbill Festival amungba tesem nung traffic inyakyim indang onük lemsatep.
“Tesüiba mapang nungbo traffic timtem kanga ajuruogo, anungji asenoki nübortem tim metemdaktsütsü atema traffic junga ketdang asütsüla” ta paisa metetdaktsü.