TR Zeliang-i Chief Minister menden metoktsü tashi JCC-i mokdang manentsü

Dimapur/Mokokchung, February 17 (TYO) : T.R. Zeliang-i Chief Minister menden metoktsü tashi mokdangba maneni alitsü, ta JCC-i Hokolbarnü sangdong ka nung metetdaktsüogo.
Public atema lenji oa February 18, 2017 nungi anepdang 9:00 ako nungi nikongdang 3:00 ako tashi dang mokdangtsü aser Kin teloktemi pei pei district aser telongtet nung mokdang maneni alitsü metetdaktsür, ta Media Cell sangdong nung shia lir.
February 16, 2017 nü lemtetba ama, JCC media Cell in-charges, ambulances, vehicles school tanurtem amenba garitem, police on duty, press & media personals, medical reports abenba shirangertem, volunteers asoshi chiyungtsü aser tzü abenba garitem, kiyimba (wedding cards sayutsüla) aser asüpila atema senzüba garitem, Bus garitem aser exam duty indang garitem den pei pei arogotemi sign sür agütsüba shidi amer ‘pastors on special duty’ tenokdangba kübok maittsü, ta JCC-i nenshia metetdaktsüogo.
JCC-isa tatidang agütsüba kaketshirtem aser online applications agütsürtem asoshi ‘internet services’ lapoktsütsü atema takhangba agütsü.
JCC-i ketdangsüa inyakba nübortem mapa nung yaritepba atema Naga Council Dimapur (NCD) Vice president, Gokheto Chopy-i public dang pelaba metetdaktsüogo aser paisa public dang Dimapur nung tensa meraksatsü atema mepishia shisem, ta Media Cell sangdong nungsa shia lir.
Mokokchung: Nagaland tesem balala den külemi Ao litsü nunga anogo pungunübuba Ao Senden JCC-i ayonga Hogulbarnep 9:00 nungi nikong 3:00 ako tashi timtem kecha majurui mokdang sentong süngjem-süngjema tembangogo.
Iba mokdang sentong nung Ao Sendeni anir All Ward Union Mokokchung town, Likapur, Ao Kaketshir Mungdang, Mokokchung Town Lanur Telungjem, Sumi aser Lotha hoho (tetsür telungjem dena), Eastern Nagaland Peoples Organization Mokokchung, Eastern Nagaland Women Organization Mokokchung, Eastern Nagaland Students’ Federation (ENSF) Mokokchung aser Mokokchung town kübok ward ajak nungi tetsürtem densema nübu aika arua shilem agia liasü.
Feb 18 nungi khen atema mokdang tera salatsür. Aji oda, Nagaland Chief Minister T.R Zeliang pa menden nungi aluba osang tejangja ka mangu tashi Govt. Office-tembo melapokdaktsütsü aser Govt. garitema mejajadaktsütsü, ta Ao Senden JCC ketdangsürtemi osangzülurtem den jembidang metetdaktsü.
Tamalen NTAC aser JCC ajanga Nagaland Municipal & Town Council election maparen dak sentakba nung koba takhangbatemsa agüja lir, itemji tang Chief Minister T.R Zeliang pa menden nungi aluba sülen tanüngba maparentemji inyaka aotsü alinung, nübur ajaki renema atatsü asoshi Ao Senden JCC-isa metetdaktsüogo.
Article 371 (A) ya maneni kümzüka ayutsü aser municipal act nung koba Naga nunger dak mapetba lir, itemji meyanglushi tashi iba tongpang ya maneni raratsü, ta Ao Senden JCC ketdangsürtemisa ashi.
Jan 3 nungi tenzüka Naga nunger temeden atema rarayonga arudang, kija-kibong aser lokti kwikatisa nübu, rongsen den sarasadem ajanga yaritepogo, parnok ajak dang Ao Senden JCC-i pelaba olen ka metetdaktsü.