TR Zeliang-i CM menden nungi alutsüla: NTAC

Kohima, February 9 (TYO): Tanü NTAC, Kohima Media Cell-i sangdong ka ajanga, TR Zeliang-i jembiba otem aser benokbatem ajak tembangogo, joko tang tensa süngjemtsü atema lenmangji TR Zeliang shisatsü dak dang keta lir, ta metetdaktsü.
“Khuret agia office menden nungi alutsü atema akhangba ajanga dang, TR Zeliang’er cabinet-i ashioktsüba ajanga nisung taküm samaba, yiruba aser kiojen raksaba sügjemtsü,” ta NTAC-i ashi.
“TR Zeliang pusmeer MLA majority liaka mesüra pa tanga yimtenren party nung adenbaji onoki merpeprager, saka Tribal Hoho temi akahgnbaji, nisung asem asüba, aika yirutsüba aser office aika arongba atema TR Zeliang-i Chief Minister office menden nungi alutsüla. Anungji TR Zeliang aser pa pusmertemi aibelen atema tatemtsü yanglua MLA aikati pusemba indang jembibaji shisamaka lir, kechiyong iba ya assembly nung ‘floor test’ ka masü,” ta sangdong nungsa shia lir.
TR Zelaing menden nungi timi alutsü atema tatembanglen kati arudar, ajisüaka iba mapang tembangerbo state nüburtemi mera tesahsi agitsüba dak alaka tanga lenmang mali, aser iba ajanga timtem adokbajibo TR Zeliang aser par cabinet khuret asutsü,” ta NTAC, Kohima  Media Cell ajangasa metetdaktsü.