TR Zeliang-i CM menden toktsüogo

Opposition tajung ka ama shilem agitsü

Kohima, Metsüremi (March) 6 (TYO): Nagaland Chief Minister T R Zeliang-i tanü chief minister menden nungi anenogo aser Assembly nung tashi tait opposition ka ama shilem tajung agitsü ta nangzükogo.
“Tanü CMO nung cabinet senden ka amenba sülen kü den külemi council of ministers-i Governor dangi menden toktsüba shidi yokogo” ta TR Zeliang-i osangbener den jembidang ashi.
Election indang result adokaka pai menden toktsütsü memulunger ta olen ka jembiba atema Zeliang-i ashiba agi, “Nisung shingaia ni menden yujang ta takhangba magütsü, kechiyong 12 buba Nagaland Legislative Assembly indang kümsükji Metsüremi (March) 14 nü ang tembangtsü.”
Sorkar anentsüba indang tetuyubaji Election Commission nungia arutsü aser iba sülen jiang Chief Minister-i assembly anentsü telemtetba agitsü aser sorkar tasenji akümtsü, ta paisa ashi.
Metsüremi (March) 4, 2018 nü NPF MLA 27 senden ka amendang assembly tasen nung pa legislature party leader asütsü shim. Iba sülen pai Governor dangi züngsemtemi bangzüng renemba osang abenba den menden teimba anguba telok ka ama NPF-i sorkar akümtsü temelaba meshi, ta paisa shisem.
NPF den election magidang tenangzüktep ayur NPP aser JD(U) teloktemi NPF pusemba shiditem Governor nem agütsü, ta TR Zeliang-isa metetdaktsü.
Paisa Prime Minister Narendra Modi aser BJP president Amit Shah naprong dangi shidi balala ajanga “tesüiba küm 15 tashi Nagaland nung teloktep sorkar kümteta aruba ama taruba sorkar akümtsü atema BJP indang tebilemba kechi lir” ta asüngdang.
“2003 küm DAN sorkar kümtetba mapang nungi onoki election magidang BJP den tesentaktep kecha meyui dang toktepa aru” ta paisa ashi.
Yashi BJP-i NPF den tesentaktep malitsü lemtetba osang angashiba sülen aser ano onok den yariteper NPP o JD(U) teloktemi telemtetba meyipa agiba ajanga ozü Council of Ministers anenba shidiji agütsü, ta paisa ashi.
6-Tening Assembly Constituency onük atema TR Zeliang-i “vote azüngba anogo nung iba menden den NR Zeliang dena NPF-i takok nguogo ta sangdong aser winning certificate agütsüba den Election website nunga osangji sangdong” ta ashi.
“Kulikaket agütsüba sülenbo Returning Officer-i ken o aruba magizüktsüba liasü saka parnoki kechi tangatetba nung vote züngshi’ar memetet. Iba inyakyim ya Representation of the People Act, 1951 alema inyakba lir kechiyong ken o ji election petition ka ama okadaki aotsüla” ta paisa metetdaktsü.
Alongtaki A/C nung vote agütsüba dang nungi züngtetba teimba liasü aser iba jagi takoker nem certificate magütsüdang NPF candidate Dr Benjongliba-i ken o ka benok saka RO o CEO Nagaland nati ken o ji magizük, ta TR Zeliang-isa ashi.
Nagaland nung alirtemi NPF nem vote agütsüba aser menden teimba nung takok ngudaktsüba atema paisa pelaba metetdaktsü aser tesüiba küm 4 tashi pai sorkar ketdangsüa arudang pa nungita yariba atema cabinet züngsemtem danga pelaba shisem.
“Naga nungertemi election magidang Naga yimten latetdaktsünüa liasü aser iba jagi ni merangdang saka takok mongutet. Ajisüaka, asenok tajungtiba agüja iba atema inyakogo. Iba mapa nung yaritepba atema arogo, kin hohotem aser telok ajak dang kanga pelar” ta TR Zeliang-isa metetdaktsü.
“Taruba sorkar jagi Naga nunger atema inyakba mapa ajak nung onoki nungita yaritsü aser Naga nunger atema opposition tashi tait ka ama shilem agitsü”
Taruba sorkarji tashi tait ka asütsü asü koda ta osangbeneri asüngdangdang, “sorkar tashi aittsübaji sorkar tasenba dak dang keta lir, kechiyong parnok rongnung züngsem tasentem dena lir aser ano menden telemsaji 31-32 lir” ta TR Zeliang-i langzü.
Assam Minister aser BJP lennir Himanta Biswa Sarma-i Manipur nung NPF ji registered political party balaka lir ta ashiba atema paisa, “Nagaland nung BJP indang unit ka lir aser iba amaji Manipur aser Arunachal nung NPF indang unit tem lir, saka Central office jibo Kohima nungang lir” ta ashi.