TR Zeliang-i Delhi nung tongtipang ketdangser aika ajuru

September 07, 2015 nü Nagaland Chief Minister, T.R. Zeliang-i Air India Chairman & Managing Director (CMD), Ashwani Lohani den ajurutepdang agiba noksa angur.

Dimapur, September 07 (TYO): September 7, 2015 nü Nagaland chief minister TR Zeliang-i Air India Chairman & Managing Director (CMD), Ashwani Lohani den ajurutep.
Iba mapang TR Zeliang-i Ashwani dang Dimapur o Guwahati aser Delhi tsüngda Air India tayimtsütem senzütsü mepishi. Dimapur-Guwahati-Delhi sectors nung senzüsenbongertem nisung aika lir, ta chief minister-isa shisem.
North East Region atema Guwahati ji tiyongtiba lir aser iba air connectivity ajanga tanga North Eastern State tem nema tajangzük bener arutsütsü, ta TR Zeliang-isa metetdaktsü.
Roads & Bridges Minister, Vikheho Swu, Advisor to Chief Minister Lalthara aser PRC, Nagaland House, Rajiv Bansal nungertemi TR Zeliang meina ao.
Ano, September 6 nü TR Zeliang-i Union Home Minister, Rajnath Singh den par kidang ajurutep.
Iba mapang TR Zeliang den Municipal Affairs Parliamentary Secretary R. Tohanba, Parliamentary Secretary M. Kikon, Advisor to Chief Minister Lalthara aser Manipur nungi NPF MLA pezü den NPF Manipur Unit tir nungertem liasü.
Rajnath den senden agidang Chief Minister-i Nagaland nung tzünglu ajanga takoksa jenti bener arutsüba aser anentsüh aika alua timtemba onüktem lemsatep.
Paisa Phesama yimtsüng nung anentsüh aluba ajanga Dimapur-Kohima-Imphal National Highway raksaba aser iba ya ajanga Nagaland aser Manipur state tem timtem ajuruba osang metetdaktsü.
Iba anentsüh reprangdangtsü aser asadangtsü atema Union Home Minister-i telok ka yokang aser National Disaster Relief Fund kübok senotsü teyari agüjang, ta TR Zeliang-isa Rajnath dang mepishi.
Senden nungsa Manipur nungi NPF MLA pezüi Union Home Minister dang parnok Manipur Legislative Assembly nungi anenba kulitem ashi.
Union Home Minister-i Manipur sorkar dang Tamenglong aser Chandel district tem nung Autonomous District Councils tentettsü atema tetuyuba agüjang, kechiyong item election ya June 10, 2015 nü agiogo, ta Manipur NPF MLA temisa mepishia metetdaktsü.
T.R. Zeliang-isa September 5, 2015 nü Union Minister for Urban Development, Venkaiah Naidu den par kidang ajurutepogo.
Iba mapang Chief Minister-i Naidu dang, Nagaland nung tongtipang yimti ana lir aser kaji state yimtiba Kohima aser kaji Dimapur lir, ta ashi.
Iba yimti anaprong ya India sorkari tenzükba Smart Cities Programme kübok dendakjang, ta TR Zeliang-i Union Minister dang mepishi.
Smart Cities Programme kübok Nagaland nung ‘Green City’ project ka tenzük nung ajungtsü aser ibaji Dimapur aser Kohima tsüngda yanglu junger, ta chief minister-isa Naidu dang ashi.
Iba mapang TR Zeliang den Municipal Affairs Parliamentary Secretary, R. Tohanba aser Advisor to Chief Minister Lalthara na liasü.