TR Zeliang-i Dr Shurhozelie nem tenüngsang agütsü

September 26, 2015 nü Hotel de Oriental Grand nung Dr Shurhozelie indang taküm otsü kaket sayaba sentong nung Nagaland Chief Minister TR Zeliang den DAN Mendenbuba aser NPF Tir, Dr Shurhozelie Liezietsu nati kaket amer agiba noksa angur.

Dimapur, September 26 (TYO): Nagaland nung DAN sorkari mapang tamajung ajurudang temulung lemteta ammetdakji Democratic Alliance of Nagaland (DAN) Chairman aser Naga People’s Front (NPF) President, Dr Shurhozelie Liezietsu liasü, ta Honibarnü Nagaland Chief Minister, TR Zeliang-i ashi.
Tanü Hotel de Oriental Grand here, Kohima nung Dr Shurhozelie indang taküm otsü kaket sayaba sentong nung Chief Minister TR Zeliang-i Dr Shurhozelie dang pelaba metetdaktsü.
Tang aliba DAN sorkar asoshi yimten ketdangsüba tsütsü khuret ajurudang Dr Shurhozelie dak shia metetba, yimten tangatetba aser shisatsü aliba den pa akhümket aser yimten lennir tejen ka asübayong iba khuret kokteta sorkar kümzük, ta TR Zeliang-isa ashi.
“Nai tang aliba DAN sorkar loksa moudaktsütsü atema kanga dang bendanga agüja len anibaji rongsen agi malizüktetba mapa ka lir aser iba atema nü nem tenüngsang agütsür. Tarutsü anogotem nunga nü lenisüba teti onok den alitsü amanger, aser Nagaland sorkar atema dang masü saka Nagaland nung alir ajak atema tashi angudak aser temoatsü ngudaktsür ka asütsü atema nü nem anema aliba taküm aser arishi talang moajang ta ni sarasademtsür” ta Chief minister-isa kaket sayatsüdang ashi.

6972 “Takotet nisungtem indang taküm otsü kaket azüngertem aika otsütem ajanga tajangzük ngudaktsür. Iba taküm otsü kaket ya pa asoshi jenjang aketba aser teti atema nüngshilung ka asütsü imlar” ta TR Zeliang-i Dr Shurhozelie indang kaket moatsü.

Tanü sentong nung Dr Shurhozelie-ia o tatsüka jembidang ashiba agi, kaket zülurtemi pa den mezüng ajurutepa pa indang taküm otsü kaket ka zülutsü asüngdangdang pai kecha melangzütet.

“Tenati kü dang kaket zülutsü asüngdangdang ni nüma metangteti liasü. Tangar ajungmesotsü atema kü taküm otsü kaket zülutsüsa kecha malitsü ta ni mezüngbo bilem, saka tanübo ni kü sasa nüma tanga bilemer” ta Dr Shurhozelie-isa ashi.

Dr Shurhozelie indang taküm otsü kaket ya Dr Imotemsu Ao aser Archaeologist & Dr Tiatoshi Jamir nati külemi züluba lir.