TR Zeliang-i ENPO lennirtem den ajurutep Kin ajaki prangpong-injang abenba teloktem shibangtsü ayongzük

Dimapur, Feb. 24 (TYO): Eastern Nagaland tsütsü aliba kintem tsüngda tensa tajungba kümdaktsütsü atema Eastern Naga Public Organisation (ENPO) aser Eastern Naga Legislators’ Union (ENLU)-i mapa tajungba inyakba atema Nagaland Chief Minister TR Zeliang-i tenüngsang agütsü.
Bodbar anüngdang ENPO tatong tir Sashi Naga-i anir züngsem tenet den ENLU tenüng nungi C. Kipili Sangtam nungertemi Chief Minister den ajurutepa pa indang residential office nung sensaksemdang, TR Zeliang-i parnok dang February 6 nü Shamator aser Kiphire tsüngda apuani tepsetba tatalokba bushisüngdangba maparen nung amalitepa yariteptsü mepishia metetdaktsü.
Iba tatalokba ajanga Sangtam aser Yimchunger tem tsüngda mangatettep adok aser kibong meyirjang aika den kaketshirtem timtem ajuru, ta paisa ashi.
Chief Minister-isa parnok dang kin balalai parnok kümzüka ayutsü atema prangpong-injang abenertem yua aliba shibangtsü ayongzük.
Kin asoshi prangpong-injang abenba teloktem ayuba nung lendong keta lir aser item telok shibangtsüla. May 2015 nung Longleng nung ENPO senden nung kin balalai prangpong-injang abenba teloktem shibangtsü atema onük benoka lemsatepogo, ta TR Zeliang-i tanü senden nung ashi aser idangji Eastern Nagaland züngsemtemi iba asoshi tekaratiba nung telemtetba ka agitsü ta langzü.
ENPO nungi lennirtemi kin balala den ajurutepa sorkar aser ozüng amertem den bushisüngdangba maparen nung yariteptsü atema ayongzükogo aser parnoki akokba tashi yariteptsü ta Chief Minister dang nangzük.
Nisung tepsetertemji aputsü aser ozüng tapet agi merenshitsü. Parnokji shirnok südir süaka, nisung tepsetbaji ozüng alema inyakba lir anungji tatok magütsütsü, ta Chief Minister-ia parnok dang ashi.
Aibelenertem aputsü aser ozüng tapet agi merenshitsüla ta Yimchungru aser Sangtam nungertemi shiogo, ta senden nung Sashi Naga-i TR Zeliang dang ashi.
ENPO lennirtemi kin ajak dang sorkar nem bushisüngdangtsü asoshi mapang atakzüka magütsütsü shiogo, saka sorkari tentetba Special Investigation Team-i iba onük atema mapang agir ama bilemer, ta paisa shisem.
Pungro sub division nung ki 219 raksatsü aser ibaji ajanga nisung 1362 timtemer. Parnok rongnung kaketshir 456 lir aser 119 sorkar mapa inyakertem lir. Iba asoshi Disaster Management Agency grant relief & aid agütsütsüla ta ENPO lennirtemi chief minister nem osang metetdaktsü.
Ajisüaka, Chief minister-i ashiba agi, iba ya nisungi adokdaktsüba lendong ka lir asünung SDMA ajanga teyari agütsütsübaji tim masü.
Sorkari tasür kibong nem sen lakh ka teyari agütsütsü nangzükba magizükba onük atema TR Zeliang-isa ashiba agi, iba asoshi pai kecha meinyaktettsü kechiyong iba ya sorkari lateta yur inyaka aruba mapa ka lir.

You must be logged in to post a comment Login