TR Zeliang-i gari lenmang majungba atema rongdak senden ka ayonga amen

Dimapur, August 24 (TYO): Alima tesem balala nung sorkar aika Social Media ajanga temelenshi bener arutsüogo aser tanü putu nung Social Media ya kanga dang nüngdak ka kümogo. Chief Minister, TR Zeliang-i Nagaland nung sensotem den tongteprateptsü nükjidong nung Social Media nung tetsüng ajemokba ajanga inyakyim nung temelenshi lir, ta Media Cell, CMO Nagaland sangdong ka nung metetdaktsü.
Anogo ishika tsüngda Chief Minister TR Zeliang indang online account balala nung nisung aika züngsemogo aser itemji Facebook nung followers 6714, Twitter nung 215 aser Instagram nung 373 lir, ta sangdong nungsa shia lir.
Item online account balala ajanga chief minister den Nagaland nung gari lenmang majungba onüktem lemsatep aser iba nungji ajemdaker Brihostibarnü TR Zeliang-i pa indang residential Office nung rongdak senden ka ayonga amen.
Senden nung gari lenmang yanglushitsü aser anepalutsü indang onüktem benoka olemtep. Sorkari infrastructure renloktsüba, tashishitsü melii mapa inyaktsüba aser ketdangsübaren ajungtsü atema mapa inyaker aser iba dak sendakba shisatokden sentong ka agitsü, ta CMO sangdong nungsa metetdaksü.
PWD(Road & Bridges), National Highway, Nagaland State Disaster Management Agency, National Highways & Infrastructure Development Corporation Limited, Border Roads Organisation amala sorkar department tem atema shisatokden sentong ka ayonga agitsü sorkari acha-ayangdar aser iba mapang parnoki mapa inyakba osang tejangja metetdaktsütsü. Iba shisatokden sentong nung Civil Societies, Tribal Hohos aser NGOs jaoktsü, ta sangdong nungsa shisem.
Social Media nung public-i kanga tongtipang onük lemsatepbaji gari lenmang indang lir. Anungji, gari lenmang dak sendakba sorkar department ajaki yimjak nung parnoki inyakba osang tejangja metetdaktsütsüla, ta tanü senden nung TR Zeliang-i ashi.
Chief Minister-isa gari lenmang dak sendaka aliba nodal Department ajaki osettsüset aser nübo amshia mapa inyaktsü tetuyuba agütsü.