TR Zeliang-i J&K CM Mufti Mohammad Sayeed mang ayimer

Dimapur, January 7 (TYO) : Tanep New Delhi nung Jammu & Kashmir Chief Minister, Mufti Mohammad Sayeed asüba osang angashia aoksar, ta chief minister TR Zeliang-i tanü sangdong ka nung metetdaktsü.
Asür Sayeed ji yimsüsür aser lennir tajung ka liasü aser pai linük asoshi mapa tajung aika inyakogo. Pa dak yimya tajung aliba aser lenisüba tashi aliba ajanga pai Jammu & Kashmir ama tensa mejungi aliba state ka nung takok ngua mapa inyak, ta TR Zeliang-i sangdong nung shia lir.
Asür Sayeed-i Centre sorkar dang Kashmir tebilemtsü koktettsü atema talenba kecha melii olemtep tenzüktsü takhangba agütsü aser ibaji Naga nungeria ajizük, kechiyong Naga nungera küm 50 shi yimten tebilemtsü khuret ajanga timtema arur, ta paisa ashi.
Jammu & Kashmir nung asür Sayeed ji kanga dang tongtipang nisung ka liasü aser pai yimten telemtetba agibatem linük ajungai süoki ia agizük. Pai iba lima toktsür aoba ajanga linük nung yimten lennir tajung ka samaogo. Sorkar aser Nagaland nung alir ajak tenüng nung ni asür Sayeed mang ayimer aser Tsüngremi par kibong nem tesünep aser anisüngzük agüjang ta sarasademtsür, ta Nagaland chief minister-isa metetdaktsü.
Brihostibar anepdang All India Institute of Medical Sciences, Delhi nung Jammu & Kashmir Chief Minister Mufti Mohammad Sayeed asü.
Arishi küm 79 tain Sayeed’er jala aser Peoples Democratic Party president, Mehbooba Mufti-i tebu menden melenzüktsü ama imlar.
Hopa ana shi Sayeed ya temang manemi mozükidang anepaluyonga aru. Pa teku nung timtem ka adokba atema yaritepa aru saka pa temang tamajungba akümba sülen yashi nungi pa ventilator teyari agüja anepalu.
Tanü asür Sayeed mang par state yimtiba Srinagar-i tayimtsü ajanga bener ogo aser pa nem akhüm agüja Jammu & Kashmir sorkari anogo tenetnü mang ayimtsü osang metetdaktsüogo.