TR Zeliang-i kaketshirtem ayongzük

Dimapur, October 6 (TYO): Hokolbarnü Chief Minister TR Zeliang-i Tuensang jilai aodang Chare nung anenzüker kaketshir lennirtem den ajurutepa sensaksem.
Iba sentongji Chare Students Union-i ayongzük aser TR Zeliang-i parnok den o jembidang, kaketshirtem aser lanurtemji tarutsü alima yanglurtem lir anungji nenok tebilemtsü tulu lir, ta ashi.
Paisa, lanurtem dang yimya tajung benshitsü, ochishia alitsü aser nendaka inyaktsü ayongzüka liasü.
“Tanü asenoki inyakba ajanga asüng asen tarutsü lemtettsü. Yangi sentepa alirtemi tarutsü tajung atema külemi longjemer mapa inyaktsü ayongzüker. Tanü asen loktiliba nung tetsükdaktsütem ajurua aliba ya asenok longjemer inyakra koktettsü” ta chief minister-isa kaketshirtem ayongzük.
Iba mapang TR Zeliang meina Power Minister, Kipili Sangtam; Planning & Coordination, Advisor CM Chang aser sorkar ketdangsertem den public lennirtem aika liasü.
Honibarnü TR Zeliang-i 25 buba Loyem Memorial Senior Soccer Open Championship tenzüktsütsü.