TR Zeliang-i Kejanglwa yimdak GPS/GMS Building semzüktsü

Peren, March 09 (TYO): Tanü Opposition Lenir, TR Zeliang-i Peren district kübok Kejanglwa yimdak GPS/GMS Building tasenba semzüktsüogo; iba sentong nung NPF Party nung inyakertem aser tesem nung lenirtem dena liasü, ta ketdangsertem osang ka ajanga metetdaktsü.
“Asenok Naga nunger tanüngba jakdang lir aser asenoki talisa shisaliok nung meranga inyaktsü mapang tongogo,” ta Zeliang-i ashi.
Building tasenba yangluba atema yimdaklirtem nem tenüngsang aguja pai, iba ya ajanga nenok telongjem aser shisaliok atema bilema inyakba kuli sayur, ta ashi.
Iba tesem nung tanga projects dak sendakba nung pai yimdaklirtem dang kümzüka aser wazüka ayutsüji yimdaklirtem mapa lir, ta ashi.
Paisa tsüraburtem, tesayurtem aser kaketshirtem dang longjemer inyaktsü ayongzükba den külemi lanurtem dang sorkar mapa dak alia tanga lenla nung lenmang bushitsü ayongzük.
KVC Chairman, Pauheigwang-i lokti pelaa agizükba o jembi, KBC Pastor, Paulamba-i sarasadem aser JE DMA Peren town, Puikosing-i GMS Building yangluba osang metetdakja liasü.
VEC Chairman, Pauki-i tepela anküp o jembi aser KBC Home Evenagelist, Irangchangbe-i sentong tembanga sarasadem.