TR Zeliang-i Mangkolemba ADC office tasenba semzüktsütsü

Dimapur, October 16 (TYO) : November 13, 2015 nü Chief Minister, T. R Zeliang-i Mangkolemba nung ADC office tasen lapoktsütsü.
Iba osang ya October 9, 2015 nü Agriculture Parliamentary Secretary, Dr. Benjongliba Aier-i metetdaktsü.
Dr. Benjongliba menden ser Mangkolemba Sub Division Planning Development Board senden agidang, Chief Minister, T.R Zeliang lenisüba kübok DAN sorkari Mangkolemba Sub Division nung terenlok bener arutsüba aser ano Mangkolemba ADC office tasen lapoktsütsü atema mulunga agizükba atema senden nung adenertemi pelaba metetdaktsü.
ADC office tasen lapokba sentong atema planning committee ka shim. Iba luden nung convenor SDO (C) Mangkolemba alitsü aser züngsemtemji E.E PWD (R&B, SDA, BDO, SRCS, SMO, SDPO Mangkolemba aser Vice Chairman, Mangkolemba Adhoc Town Committee (MATC) nungertem asütsü aser parnoki October 31, 2015 anogo matongdang ADC office tasen lapokba sentong ajak renemtsü.
SDPDB senden nungsa Mokokchung District kümteter küm 125 benjungmung nung shisatsü, nübo aser rongsen agüja yariteptsü bangjemtep.
Ano, September 25, 2015 nü Mangkolemba Longnak lenmang nung nübodoka mapa inyakdang Mangkolemba nung alirtemi yaritepba atema SDPDB-i züngsemtem aser public ajak dang pelaba metetdaktsü.
Senden nungsa Longchem nung GHS building tasen yanglutsü atema tebilemba benoka olemtep aser ibaji sorkar dangi abentsü lemtet.
SDPDB-isa Vikuto yimtsüng nung GPS ka lapoktsü tebilemba agizük aser Merangmen office complex nung water supply maliba atema sorkar dangi abentsü lemtet.
SDPDB züngsemtemi Mangkolemba Sub Division kübok tsükong asem – Changkikong, Japukong aser Tzurangkong nung aliba yimtsüng ajak Department of Under Developed Area (DUDA) kübok enoksemtsü atema sorkar dangi abentsü telemtetba agi.
Tsükong asem Senso Mungdang nungi Tirtemi, Nagaland nung sub division tejentiba süaka, iba tesemi tangar memenep aser terenlok mali anungji tsükong asemprongla DUDA kübok züngsemtsüla ta onük benokba SDPDB-i agizük aser sorkar dangi abentsü lemtet.
Anosa, züngsemtemi Longchem aser Alongkima nung Urban station committee tentettsü aser Mangkolemba nung Block Institute Training of Teachers lapoktsü atema sorkar dangi abentsü lemtet.