TR Zeliang-i minister 4 anentsü; Dr Shurhozelie DAN Chairman shim

Kohima, December 13 (TYO): Taonung Nagaland sorkar nung temelenshi tulu ka adokogo aser ibaji Nagaland Chief Minister T R Zeliang-i cabinet minister pezü menden nungi agienba lir.
Pai aniba sorkar anentsütsü atema mapa ka inyakba sülen TR Zeliang-i cabinet minister pezü anentsüogo.
Taonung 9:00 ako meta State Cabinet Secretary Pankaj Kumar-i sangdong ka metetdaktsüba nung, “Chief Minister-i ashiba nung ajemdaker Governor P B Acharya-i cabinet minister pezü mapa nungi anentsür” ta shia lir.
Par pezüji Home Minister Y Patton, School Education & Parliamentary Affairs Minister Tokheho Yepthomi, PWD (Roads & Bridges) Minister Dr Neikiesalie Nicky Kire aser Environment, Forest & Climate Change Minister Neiba Kronu nungertem lir.
December 9, 2017 nü TR Zeliang aser NPF President Dr Shurhozelie Liezietsu tsüngda putepshitsü atema tenangzükba agia sign asüba sülen-a par pezüi Chief Minister TR Zeliang anema mapa inyakba atema parnok menden nungi anentsü ta osang ka ajanga ashi.
Asüngnep nungi anogo ananü atema State Assembly indang winter session tenzüktsü aser ibaji masüdang TR Zeliang-i cabinet minister tasen pezü shimoktsü ta osang ajangasa shisem.
Taküm July ita MLA 36-i Chief Minister Dr. Shurhozelie Liezietsu atsüngdoktsü atema TR Zeliang den adenba sülen NPF sasep nung mepetmesü adok. Ajisüaka, December 9 nü telok anaprongi putepshitsü atema telemtetba agi.
TR Zeliang den adenba NPF MLA 37 nungi parnok 16-18 shi ka Dr. Shurhozelie-i aniba telok nung adentsü atema tanü de Oriental Grand nung adenshia lir ta tanü osang kar jembia liasü.
Lok Sabha MP Neiphiu Rio-i Viswema nung Southern Angami Youth Organisation indang küm 25 jubilee nung adenba sülen pa-a de Oriental Grand-i ao ta osang ajangasa ashi.
Ajisüaka, Dr. Shurhozelie-i iba ama inyakyim kecha mali ta ashi aser paisa parnok den ajuruteptsü memulung.
Tanep Chief Minister-i NPF aser DAN legislators senden amentsü jazükba nunga de Oriental Grand-i nung adenshiba MLA tem maden.
Ajisüaka, Dr. Shurhozelie-i December 9 nü Memorandum of Reconciliation nungi masetshii nokdakba aser pa nungi telangzüba tajung manguba agi ghonda ana shi lir külen MLA temi mapang melenshir amenba NPF-DAN legislators senden nung aden.
Tanü nikongdang senden nung DAN legislators-i Dr. Shurhozelie maneni DAN Chairman asütsü shim aser TR Zeliang-i aniba ministry nung menden melenshitsü ta bangzünga renem.
Iba osang zülu tashi nung minister pezü menden nungi anentsüba dak alaka cabinet minister tasentem shimba osang kecha maliasü. Par pezüji Dr. Shurhozelie den adenba MLA 10 nungi shimtettsü.