TR Zeliang-i Mkg town quasquicentennial inti sentong tenzüktsütsü

Mokokchung, December 09 (TYO): Mokokchung Town kümteter küm 125 ajungba quasquicentennial benjong “Pioneering Ahead” omen nung ajemdaker tan December ita 12 nungi 17 tashi yangi Imkongmeren Sports Complex Mokokchung nung amungtsü asoshi sentong tarensen balala lemsar kanga mazüngi inyaktepdagi.
Iba benjong Nagaland Chief Minister, T.R Zeliang-i yangi Imkongmeren Sports Complex nung anepdang tenzüktsütsü aser idangji pai jubilee nüngshilung ka azüngtsüba den jubilee nüngtem adokba nüngo kaket ka dena sayatsütsü.
December 12 nüji Minister for National Highway, Mechanical & Election Nuklutoshi, Mokokchung D.C Sushil Kumar Patel IAS, Ao Senden Tir Imolemba Jamir, taoba mapang Mokokchung town committee Mendenbuba, M. B Longkumer parnokia shilem agia jembitsü. Kasa sentong nung Tuensang, Wokha, Zunheboto aser Mokokchung district-tem nungi sobaliba yar tsüngsang balala sayatsü.
December 13, 2015 Deobar nü Arogo, fellowship aser tamangba yimsü balalai Mokokchung town atema balaka sarasadem sentong ayongzüka amungtsü.
December 14 nungi Mokokchung Food Fest, Farmers Fair, Trade Stalls, Kids Carnival aser Fun Stall balala lapoktsü. Iba den külemi Inter-ward arr atsüteptsü (tug of war), Martial Art display aser Mahattam (greatest) Muthia shimba sentongtem alitsü. Iba nüjisa Inter-Ward Volleyball tournament tenzüktsü. Nikongdang “Vision Mokokchung 2040” onük nung penal discussion Part-I sentong Cosmos Hall nung akatsü aser aonung ‘Unchanged Mellowdy’ ta ser kenten sentong ka alitsü aser yangji Mokokchung nungi akhi kentener aser tanü asüng kentenertemi shilem agitsü.
December 15 nüji P.Shilu Park nung tanurtem atema Chibi & Open Cosplay alitsü, Indoor Stadium nunga aluyimertem atema shisatokden sentong ka ayongzüka akatsü. Kasa anogo nungjisa Cosmos hall nung “Vision Mokokchung 2040” panel discussion Part-II alitsü. Jangratemtsü kaji, iba aonungji ‘Nagaland Open Freestyle Dance Competition’ aser ‘Fashion Fiesta’ sentongtem alitsü.
December 16 anepdang ‘Mokokchung Elders Meet’ ta ser multi-purpose hall nung tantsür tambur atema sentong balaka akatsü aser iba sentong nungji tsürabur Thongo Imlong tetushi tejaoker asütsü. Nikongdang sentong nung Odisha Angh, Dr. S.C Jamir tongti tesemdanger asütsü. Kasa sentong nung K.Khekiye IAS (Retd), Alemtemshi Jamir IAS (Retd) natia shilem agitsü.
Iba aonung Naga Orpheus Retro Nite ta ser kenten sentong ka alitsü aser iba sentong nung FCI Executive Director aser taoba Mokokchung D.C Abhishek Singh IAS tetushi tesemdanger asütsü jaoka lir.
Dec 17 aonung 5:00 ako nungi kenten sentong ka ayongzüka lir aser iba sentong nung Shillong Chamber Choir-i tongti sabang agitsü.