TR Zeliang-i Nabam Tuki aser Union minister tem den ajurutep

Dimapur, September 8 (TYO) : Mongulbarnü Nagaland Chief Minister, T.R. Zeliang-i Arunachal Pradesh Chief Minister, Nabam Tuki den ajurutepa August 3, 2015 nü India sorkar aser NSCN (IM) tsüngda yimjung tenangzükba agiba indang onük lemsatep.
Senden nung T.R. Zeliang-i Tuki dang yimjung meraksatsü atema state ana indang puti otsü akhümtsübutsü aser angatettsü nüngdak ta ashi.
Nagaland aser Arunachal Pradesh na lokti, rongsenkettsüng aser yimtenren nung tesendakteptsü tajung ayutsüla, ta TR Zeliang-isa ashi.
Nabam Tuki-ia TR Zeliang dang ashiba agi, North East State tem nung yimjung aser terenlok alitsü atema pai India sorkar aser NSCN (IM) tsüngda framework pusema nungittsü telemtetba agiogo saka iba ajanga par state litsü melemsatsüla.
Mongulbarnüsa TR Zeliang-i Union Minister for Agriculture and Co-operation, Radha Mohan Singh den ajurutepa tekaratiba nung Nagaland nung Veterinary and Animal Husbandry College ka lapoktsü mepishia asüngdang.
Iba mapatong agizükogo aser tang state sorkari Central Agriculture University (CAU), Imphal nem ali agütsütsüla. Ajisüaka, ali dak sendakba mapaji tan ita nungbo metembangtsü anungji taruba academic session nungi temporary campus ka nungi College tenzük nung ajungtsü, ta Union Agriculture Minister-i TR Zeliang dang ashi.
Iba mapang TR Zeliang-isa Union Agriculture Minister dang Nagaland nung College lapoktsü atema lung azüngi arutsü jaok.
Nagaland chief minister-isa tanü Chairman Airport Authority of India (AAI) R. K. Srivastava den ajurutep aser Razaphema nung Greenfield Airport lapoktsü atema DPR tembanga inyaktsü mepishia metetdaktsü.
Iba senden nung Transport minister Paiwang Konyak, Advisor to Chief Minister Lalthara aser Secretary Transport Smt. Lithrongla Chishi nungertem liasü.
September 7 nü T.R. Zeliang-isa Union Minister for Road Transport & Highways, Nitin Gadkari den ajurutep.
NDA sorkari aser Prime minister-i gari lenmangtem dak rangloker North Eastern Region nung rongsekettsüng renlokdaktsütsü atema nangzüka lir, ta Gadkari-i senden nung ashi.
North Eastern State ti nung gari lenmangtem yanglutsü atema par ministry-i küm pungu tsüngda sen crore lakh ka agütsütsü sentong lir aser kobi melii Dimapur-Kohima 4-lane Highway yanglu tenzüktsü, ta Gadkari-isa ashi.
TR Zeliang-ia Gadkari dang SARDP-NE kübok tang teinyakdak mapatongtem den Inter-State Connectivity (ISC) aser E&I Schemes kübok inyakba osang metetdaktsü.
East-West Corridor nung metenlokba ama Assam kübok Daboka nungi Dimapur tashi four-laning mapa tembanga inyaktsü mepishir, ta chief minister-isa Gadkari dang ashi.
TR Zeliang-isa, Kohima nungi Imphal adena Moreh tashi 4-lane Highway yanglutsü aser Maram-Peren-Dimapur National Highway yanglutsü atema telemtetba agitsü metetdaktsü.
Union Transport Minister-i chief minister dang tetsükdaktsü melii ali sadema angutsü, DPRs jenjang tajungba yanglutsü aser quality standards agütsüba ama mapa inyaktsü metetdaktsü.
Iba mapang TR Zeliang den R&B Minister, R. Vikheho Swu, Advisor to Chief Minister Lalthara aser C&S, R&B Himato Zhimomi nungertem liasü.