TR Zeliang-i Nagaland sorkar atema finance advisor inyaktsü ; Cabinet, Parl. Secy., Advisor & Chairman tem mapa lemogo

Kohima/Dimapur, February 24 (TYO) : Nagaland Angh-i tanü T.R. Zeliang, Advisor (Finance) to the Government of Nagaland inyaktsü shimogo aser iba ya cabinet minister indang jenjang nung lir.
T.R. Zeliang nem Cabinet minister ka nem agütsüba itasen, allowances aser tanga facilities ajak agütsütsü, ta cabinet secretary Pankaj Kumar-i sangdong ka nung metetdaktsü.
Ano Chief Minister Dr. Shurhozelie Liezietsu-ia PRO to CM inyaktsü atema Pele Khezhie aser personal secretary to CM inyaktsü atema Diethoselhou Sachii o James Liezietsu nungertem shimba osang metetdaktsüogo.
Iba osang ya Commissioner & Secretary to CM, I. Himato Zhimomi-i sangdong ka nung metetdaktsü.
February 22, 2017 nü arishi küm 81 tain, Dr. Shurhozelie Liezietsu-i Nagaland nung Chief Minister inyaktsü atema tenangzükba agia liasü.
Iba mapang Dr. Shurhozelie den cabinet minister 11-i Nagaland Angh P.B Acharya den tenangzükba agi.
Kasa anogo nungsa Chief Minister, Dr. Shurhozelie-i Parliamentary Secretary 24 shima tenangzükba agidaktsü aser iba sülen CMO nunga advisor 6 shimok.
Aijsüaka, yashi tashi nung Cabinet, parl secy aser Advisor tem indang mapalem osang kecha memetdaktsüi dang liasü, aser yashi Dr. Shurhozelie-i, sorkar tasenküma shimshiaka, tejenpurtemi bena aliba mapabo memelenshii akhi abenba kasa portfolio abentsü saka tasen purtem nem dang tanüngba mapatem lemzüktsütsü ta osangbenertem den jembidang shia liasü.
Nagaland nung sorkar tasenba nung tanü Cabinet, Parl. Secy, Advisor aser Chairmen nem mapa lemzüktsüba sülen joko NLA nung Speaker aser Deputy Speaker shimtsü dang anünga lir.