TR Zeliang-i Noke aser Kaito dang nungi kuli tejangja aginür

Dimapur, October 7 (TYO) : September 27, 2015 nü Noke Wangnao, MLA aser G. Kaito Aye, MLA nati Chief Minister TR Zeliang dangi züluba shidi nguogo aser ano osangkakettem nung nünati tatok meshia sangdongbatem angazükogo, ta Sebastian Zumvu, Press Secretary to Chief Minister, Nagaland-i Noke aser Kaito dangi züluba shidi nung shia lir.
Public lennir ka ama, TR Zeliang-i obang meputepba ken o ajak timi angatetteptsü tangatetba nung inyaka arur. Anungji, pa aser pa kinüngtsü na aija tenüng menüktsüba nung nüna tai mali ta kuli dang agütsüra pai nüna nem tatok agütsütsü kecha nungnanga mali, ta CM Press Secretary-isa shidi nung shia lir.
January 16, 2015 nü Diphupar Police Station nung TR Zeliang-i FIR ka benokba meyipa agitsüji khuret ka masü, saka pai public tsüngdang pa tai mali ta kuli agütsütsü nüngdak. Ano, paisa Reserve Bank of India aser Enforcement Directorate nem iba ken o bushisüngdangtsü atema asüngdangogo, anungji parnok nungi osang ka mangu tashi pai telemtetba kecha magitettsü, ta CM Press Secretary-isa ashi.
Kasa mapang nung Chief Minister aser pa kinüngtsü na Nagaland nung dang masü saka alima ajunga nung maksütsüogo kechiyong iba ken o ya social network ajanga belenshi. Anungji chief minister-i pa aibelen kecha mali ta sayutsü atema maparen kar inyaktsüsa akümer.
Talisa, kuli tejangja maliba aser nisung tenüng menüktsüba ken o tem tarutsü nunga tia makar nisung kar anema benoktsü akok, anungji Chief Minister-i tsünglanglen agüja aliba onüktem indang osang tejangja nüna nem shidaktsünür, ta CM Press Secretary-isa Noke aser Kaito dang shia lir.
“Mohan Mani indang maitsü aser pa indang temetettsütem, nünati pa den kodang aser kong ajurutep, shibai nüna nem Bank documents agütsü, osangkakettem sangdong nung nüna dang shibai Press Statement nung sign asütsü ajungshi, January 15, 2015 nü shibai shidi aser taila kulikattem belenshi, aser April 22, 2015 nü Diphupar Police Station nungi FIR meyipa agiaka kodaser kasa osangji taküm July ita national newspapers nung tanaben adok?” ta shidi nung tasüngdangba agüja lir.
Chief Minister-i iba tesasatsü ken o tekaratiba nung tembangnür aser tarutsü nung tangar dak ibala mesükba tiyazü ken o ajanga tenüng menük bener marudaktsünür, ta Press Secretary to Chief Minister, Nagaland-isa shidi ajanga shiogo.