TR Zeliang-i NSF dang mepishir

Dimapur, February 23 (TYO) : February 24, 2016 nungi tenzüka Naga Students’ Federation (NSF)-i Naga nunger aliba tesemtem nung Manipur nunger garitem noktangtsü telemtetba agiba khen meyipa reprangshiang aser iba melena tanga sentongtem ang ayongzüka agiang ta Nagaland Chief Minister, TR Zeliang-i sangdong ka nung mepishia metetdaktsü.
February 14, 2016 nü NSF lennirtem Ukhrul nung Naga Lui Ngai Ni benjung nung adentsü atema aodang Manipur Police-i parnok dak tim mesüi mapa inyakba osang angazükogo. Iba tatalokba atema NSF-i Manipur sorkar dang aibelenba police tem ozüng tapet agi merenshitsü takhangba agütsüba angazükogo, ta TR Zeliang-isa sangdong nung shia lir.
NSF-i takhangba agütsüba nung ajemdaker Nagaland sorkaria Manipur sorkar den tongtepratepogo anungji, Manipur sorkar nungi telangzüba ka mangu tashi lungkak aitba sentong magii atatsü mepishir. Iba ama sentong agiba ajanga loktitem tsüngda mangatettep adoktsü aser Manipur nung alirtem dang masü saka Nagaland nunga tesem kar nung timtem ajurutsü, ta TR Zeliang-isa ashi.
Naga nunger tang yimtenren mapa tasen ka tenzüka lir aser iba nung asen kidangertem den tesentaktep tajung alitsü nüngdaker, saka kodang asen kidanger state tem anema asenoki tenokdangba agütsüdir, parnoki asenok den tsükchitep adentsü aser yimjung aser putepa aliba tensa raksatsü, ta paisa shisem.
Asenoki parnok den teti kidanger ama alitsü aser iba jagi asenoki tesentaktep tajung ayutsü merangtsüla. Anungji, NSF-i Naga nunger aliba tesemtem nung Manipur nunger gari noktangtsü telemtetba agiba meyipa reprangshitsü aser tanga inyakyim ajanga takhangba agütsütsü mepishir, ta TR Zeliang-isa mepishia metetdaktsü.