TR. Zeliang-i Phesama anentsüh nung yariteptsü atema sen lakh 10 agütsü

Dimapur, August 28 (TYO) : Hokolbarnep Chief Minister, TR. Zeliang-i Phesama nung anentsüh aluba tesem semdang aser idakji alirtem den osang tejangja metetpelaogo.
Tzünglu kanga aruba ajanga Phesama yimtsüng nung takoksa bener arutsüogo aser kiojen aika raksaa timtemertem den tejashi lemsateper, ta tanü TR Zeliang-i ashi.
Iba ya Nagaland nung anentsüh lendong tamajungtiba rongnung ka lir aser sorkari takokba lenmang ajak agi yariteptsü, ta paisa ashi.
Ajisüaka, iba anentsüh nung nisung taküm melaluba aser lendong tulu matalokba atema Tsüngrem nem tenüngsang agütsür, ta TR Zeliang-isa metetdaktsü.
Ali takang dang ngura bypass road ka tekaratiba nung yanglutsü ta Chief minister-isa ashi aser Chief Engineer, NPWD-i pa nem survey report agütsütsü tetutyuba agütsü.
Tanü TR Zeliang-i relief nung yariteptsü atema ADC Kohima ket nung sen lakh 10 tenla agütsü.
Tanü Minister, Parliamentary Secretary, MLA tem den sorkar ketdangsertem, District administration, police officer temi Chief minister meina aru.
Iba sentong nung Phesama Village Council Chairman, Vimedo-i tarurtem pelaa agizük aser paisa Chief minister nem tezüluba ka agütsü. Sentong nungsa SAPO tir, Zadeho Rikha-i o tatsüka jembi.
Ano, tanü sorkar sangdong ka nung, August 28, 2015 nü Home Minister-i Phesama anentsüh aluba tesem semdangba osang nung “PVC nem sen lakh 2 teyari agütsü ta alibaji sen lakh 1” ta melenshiba metetdaktsüogo.